Ǵarysh ınfraqurylymyn tıimdi paıdalanýǵa jaǵdaılar jasalady

ASTANA. QazAqparat - Búgin Senattyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine ǵarysh qyzmeti máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.

Qujattyń maqsaty ǵarysh ınfraqurylymyn tıimdi paıdalaný, halyqaralyq naryqta ekonomıkanyń básekege qabilettiligin arttyrý, kásipkerlik sýbektilerin damytý úshin ǵarysh qyzmeti men tehnologııalaryn endirý bolyp tabylady.

«Zań jobasy elimizde jańa tehnologııalardyń damýyna septigin tıgizedi. Búginde Qazaqstan zamanaýı ǵaryshtyq ınfraqurylymyn qalyptastyrdy, «QazSat» baılanys júıesi iske qosyldy, Jerdi qashyqtyqtan zondtaý ǵaryshtyq júıesi, dáldigi joǵary spýtnıktik novıgatsııa júıesi osy ınfraqurylymǵa kiredi. Bulardyń qoldanýdyń alǵashqy tájirıbesi kórsetkenindeı, osy ınfraqurylymnyń múmkindigin teńdeı paıdalanýǵa ǵaryshtyq júıe qyzmetiniń zańnamalyq deńgeıde qamtylmaýy qolbaılaý bolyp otyr», - deıdi Investıtsııalar jáne damý mınıstri Áset Isekeshev.

Onyń aıtýynsha, zań jobasy arqyly Jerdi qashyqtyqtan zondtaý derekterin jer ústin, ormandardy, sý nysandary men jer qoınaýyn memlekettik monıtorıngteýdi júzege asyrý sharalary qamtylady.

Sonymen birge, tótenshe jaǵdaılardyń aldyn alý jáne joıýǵa, ulttyq qorǵanys qaýipsizdigin qamtamasyz etýge múmkindik beredi. Osy baǵytta Jer, Sý, Ekologııalyq, Orman kodeksterine, sonymen qatar, birqatar zańnamalarǵa ózgerister engiziledi. «Zań jobasyn qabyldaý Qazaqstan úshin ǵarysh tehnologııalaryn tolyqqandy paıdalanýǵa jaǵdaı jasaıdy. Ekonomıkamyzdyń, otandyq ónimderimizdiń de básekege qabilettiligin arttyrady», - dedi Á. Isekeshev.