Ǵarysh ınfraqurylymyn paıdalanýdyń quqyqtyq tetikteri qamtamasyz etiledi

ASTANA. QazAqparat - Senattyń Agrarlyq máseleler, tabıǵatty paıdalaný jáne aýyldyq aýmaqty damytý komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine ǵarysh qyzmeti máseleleri boıynsha ózgerister men tolyqtyrýlar engizý týraly» zań jobasy talqylandy.

Zań jobasy arqyly ǵarysh ınfraqurylymyn paıdalaný, ǵarysh qyzmeti men tehnologııalaryn júzege asyrý tıimdiliginiń quqyqtyq tetikterin qurýǵa baǵyttalady. Osyǵan baılanysty Jer, Sý, Ekologııa jáne Orman kodeksterine jáne qoldanystaǵy birqatar zańnamalyq aktilerge ózgerister engiziledi. Atap aıtqanda, zań jobasy arqyly jer betine, ormandarǵa, sý nysandaryna memlekettik monıtorıng júrgizý boıynsha Jerdi qashyqtyqtan zondtaý málimetterin paıdalaný múmkindikteri qamtamasyz etiledi. Sonymen qatar, mundaı málimetter tótenshe jaǵdaılardyń aldyn alý jáne joıý maqsatynda da qamtylady.

Budan bólek, usynylyp otyrǵan normalar boıynsha esirtki zattary men psıhotroptyq zattardyń zańsyz aınalymymen kúresti uıymdastyrý úshin memlekettik spýtnıktik geodezııa jelisin paıdalaný kózdelip otyr.

Sonymen qatar, «Ǵarysh qyzmeti týraly» qoldanystaǵy zańǵa «Jerdi qashyqtyqtan zondtaý ǵarysh júıesiniń ulttyq operatory», «Ǵaryshtyq baılanys júıesiniń ulttyq operatory» uǵymdaryn quqyqtyq negizdeýge baǵyttalǵan jańa bólim engizilmek. Zań jobasy palatanyń aldaǵy ýaqytta ótetin jalpy otyrysyna shyǵarylady.