Ǵaryshker Aıdyn Aıymbetov «Báıterek» qazaq-orys birlesken kásipornyn basqarady

<p>ASTANA. KAZINFORM — Ǵaryshqa ushqan soń Qazǵarysh júıesinde jumys isteı bastaǵan qazaqstandyq ǵaryshker Aıdyn Aıymbetovke jańa mindet júkteldi. </p>

Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Ulttyq ǵarysh ortalyǵynda ótken RǴBO-nyń 20 jyldyǵyna arnalǵan saltanatty jıynda málimdedi. 

Aıdyn Aıymbetov 2024 jylǵy 1 naýryzda «Báıterek» birlesken Qazaqstan-Reseı kásiporny» AQ dırektorlar keńesiniń sheshimimen «Báıterek» BK» AQ basqarma tóraǵasy bolyp saılandy.

«Aıdyn Aqanulyn qyzmetke taǵaıyndalýymen quttyqtaǵym keledi. Siz ǵarysh ındýstrııasy úshin jáne jalpy salaǵa kóp eńbek sińirdińiz. Siz toǵyz jylǵa jýyq eńbek etip kele jatqan „Qazaqstan ǵarysh saparynyń“ búkil ujymyna jańalyqtary úshin alǵys aıtqym keledi. Bul — jerdi qashyqtyqtan zondtaýdy qoldaý ǵana emes, sonymen qatar tsıfrlandyrý men ǵaryshtyq tehnologııalardy biriktirýdiń nátıjesi sanalatyn birneshe tsıfrlyq platforma. Men el ekonomıkasyna naqty qoldaý kórsetetin „JerInspektor“, „Mınerals.kz“ jáne t.b ǵarysh monıtorıngi jobalaryn aıtyp otyrmyn», — dedi mınıstr óz sózinde.

Foto: «Báıterek» BK» AQ

B.Mýsın sondaı-aq «Báıterek» birlesken jobasyn júzege asyrýdan úlken úmit kútetinin aıtty. 

«Sizdiń jumys tájirıbeńizdi eskere otyryp, eki jyl ishinde Sizdiń basshylyǵyńyzben bul jumysty aıaqtap, qazaqstandyq „Báıterek“ zymyrantasyǵysh kesheninen alǵashqy ushyrylymdy toılaımyz dep úmittenemiz», — dep túıindedi mınıstr. 

A.Aıymbetov ǵaryshqa ushqannan keıin úsh aı ótken soń, 2016 jyldyń 5 qańtarynda «Qazaqstan ǵarysh sapary» UK» AQ ǵarysh júıelerin qurý jáne paıdalaný jónindegi vıtse-prezıdenti qyzmetine kiristi.  

2021 jyldyń 13 qyrkúıeginen bastap «Qazaqstan ǵarysh sapary» UK» AQ basqarma tóraǵasy boldy.