Ǵanı Beısembaev jańa mektepterdiń 1 qyrkúıekte paıdalanýǵa beriletinine kúmán keltirdi

ASTANA. QazAqparat – Oqý-aǵartý mınıstri Ǵanı Beısembaev birneshe óńirdiń bilim basshysyna jańa oqý jylynda ashylýy tıis mektepterdiń qurylysyna baılanysty eskertý jasady, dep habarlaıdy QazAqparat tilshisi.

«Jańa oqý jylynda 132 myń oryndyq 154 mekteptiń qurylysy aıaqtalyp, paıdalanýǵa berý josparlanǵan. Onyń ishinde 52 jańa mektep 1 qyrkúıekte ashylýy tıis. Ol degenimiz – 65 myń oqýshy orny. Sonyń nátıjesinde 12 apatty jáne 29 úsh aýysymdy mekteptiń problemasy sheshiledi dep josparlanǵan. Mektep qurylysyna respýblıkadan tıisti qarjy bólindi, odan bólek ınfraqurylymdar qorynan da qarajat berildi. Degenmen bizge Astana qalasy, Qostanaı jáne Túrkistan oblystaryndaǵy jańa mektepterdiń qurylysy ýaqytynda bitpeıdi degen aqparat keldi», - dedi Ǵanı Beısembaev atalǵan vedomstvonyń apparat otyrysynda.

Odan keıin mınıstr atalǵan óńirlerdiń bilim basqarmasy basshylarynyń esebin tyńdady.

Sondaı-aq atalǵan sharýany jedeldetý kerektigin jáne buǵan basqarma basshylary tikeleı jaýapty ekenin eskertti.

Aıta keteıik, atalǵan vedomstvonyń málimetinshe, bıyl 7,7 myń bilim berý ornynda 3 mln 900 myń oqýshy bar. Jańa oqý jylynda 364 myń bala mektep tabaldyryǵyn attamaq. Búginde el boıynsha 260 mektep kúrdeli jóndeýden ótip jatyr. Onyń ishinde 194 mekteptiń qurylysy 1 qyrkúıekke deıin bitýi tıis.

Buǵan deıin habarlaǵanymyzdaı Ǵ.Beısembaev oqý jylyna daıyn emes óńir basshylaryna eskertý jasady.