Ǵanı Beısembaev Jambyl oblysyndaǵy mektepte bolǵan oqıǵaǵa qatysty pikir bildirdi

<p>ASTANA. KAZINFORM &ndash; QR Oqý-aǵartý mınıstri Ǵanı Beısembaev Jambyl oblysyndaǵy mektepke bógde adamdardyń kelýi jáne muǵalimderden aqsha jınaý oqıǵasyna qatysty pikir bildirdi.&nbsp;</p>

Búgin Úkimet úıinde bolǵan baspasóz máslıhatynda tilshiler mınıstrden Tereńózek aýylyndaǵy mektepte bolǵan oqıǵadan keıin mektep dırektory men tárbıe isi jónindegi orynbasary jumystan ketýi oqıǵasyna qatysty suraq qoıdy.

«Nege bul oqıǵa boıynsha tekserý uzaqqa sozyldy? Tárbıe isi jónindegi orynbasar dırektordyń ǵana buıryǵyn oryndaıtyny belgili. Sol aýyldyń turǵyndary tárbıe isi jónindegi orynbasardy óte bilikti maman dep baǵalap otyr. Bul rette jaýapkershilik kimde?», - dep surady jýrnalıst.

Óz kezeginde Ǵ. Beısembaev osyǵan deıin bilim berý uıymdarynda bógde adamdardyń qatysýymen is-sharalar uıymdastyrýǵa tyıym salynǵanyn eske saldy.

«Bul turǵyda qatań eskertýler jasalǵan edi. Sebebi mektep oqý-tárbıe isimen aınalysýy kerek. Sondyqtan mektepke bóten adamdardyń kirýine qatysty shekteý qoıatyn talaptar bar. Mektepte bolatyn is-sharalardyń barlyǵyna oqý ornynyń birinshi basshysy jaýapty. Jergilikti atqarýshy organdarda tıisti zerdeleý jumystarynan keıin tıisti sheshim jasaldy. Olar tolyqqandy teksergennen keıin, mektep basshysy jazalandy», - dedi mınıstr.

Sonymen qatar ol mektep dırektorynyń tárbıe isi jónindegi orynbasaryna qatysty qabyldanǵan sheshimniń qanshalyqty oryndy bolǵanyn qaıta qaraýǵa tapsyrma bergenin aıtty.

«Kez kelgen myqty mamandy baǵalaýymyz kerek. Atap aıtqanda, rasynda da ol adamnyń tikeleı qatysy bolsa, qandaı myqty maman atansa da jaýapkershilikti moınyna alýy kerek. Degenmen, bul máselede orynbasaryna qatysty taǵy da zerdeleımiz», - dedi Ǵanı Beısembaev.

Budan buryn buqaralyq aqparat quraldarynda Jambyl oblysy Tereńózek aýylyndaǵy mektepte bolǵan oqıǵanyń vıdeosy tarap ketken edi. Onda «Tomırıs» laqap atymen belgili baqsy kelgeni aıtylǵan.