Ǵanı Beısembaev oqýshynyń mektepke hıdjabpen kelý máselesine qatysty túsinik berdi

ASTANA. QazAqparat – Úkimet otyrysynan keıin BAQ ókilderiniń saýalyna jaýap bergen Oqý-aǵartý mınıstri Ǵanı Beısembaev oqýshylardyń mektepke hıdjabpen kelýine qatysty máselege pikir bildirdi, dep habarlaıdy QazAqparat tilshisi.

«Konstıtýtsııa boıynsha Qazaqstan - zaıyrly memleket. Mektep te zaıyrly bolyp sanalady. 2016 jyly bekitilgen oqýshylardyń mektep formasy men kıimine qatysty buıryq bar. Ol ózgergen joq. Sondyqtan balalar bilim ordasyna mektep formasymen kelýi kerek. Bul balalardyń birdeı bilim alýy úshin jasalyp otyr. Sondyqtan bul baǵytta ózgeris joq. Endi kóterip otyrǵan másele (oqýshylardyń mektepte hıdjab kıip kelýi – avtor túsindirmesi) muny sheshe ala ma?! Birinshi kezekte biz negizgi maqsat pen adamdardyń qosymsha oıyn shatastyrmaýymyz kerek. Bala mektepte sapaly bilim men sanaly tárbıe alýǵa mindetti. Ony ata-ana qamtamasyz etýi tıis. Ol zańda belgilengen. Sondyqtan bárimiz zańdy oryndaýymyz qajet», - dep jaýap berdi Ǵanı Beısembaev BAQ ókilderiniń saýalyna oraı.