Ǵanı Beısembaev: Oqýshylar oqýlyq betterinen qanattanýy kerek
Jıynda «Oqýlyq» ortalyǵynyń dırektory Ǵanı Beısembaev uıymnyń quzireti aıasynda qandaı jumystar atqarylyp jatqanyn aıtyp berdi, dep habarlaıdy QazAqparat tilshisi.
«Keıingi jyldary bilim mazmunynyń, onyń ishinde oqýlyqtar mazmunynyń túbegeıli ózgerýine baılanysty, qoǵam tarapynan syn da az bolmady. Tipti Prezıdentimizdiń ózi bul máselege nazar aýdaryp, oqýlyq sapasyn jaqsartý kerektigin atady. Alash qaıratkeri Ahmet Baıtursynov aıtpaqshy, «Oqý quralynyń eń ulyǵy – bala oqytatuǵyn kitap» bolsa, «Árkim ózi jaqsy biletin nársesin synaýy kerek» degen qaǵıdasyna saı bolý, árıne, erekshe jaýapkershilik júkteıdi. Tıisinshe, ádildigin tikesinen aıta júrip, sarapshy uıym retinde kemshilikterdi túzeýge bastaý – asa mańyzdy mıssııamyz. Tipti biz onda álemdik órkenıet jetistikterimen sheber úılestire otyryp, mándi de mazmundy taqyryptardyń jazylyp, aıshyqtalýyna kúsh salý kerektigin tereń uǵynamyz. Basqasy basqa, bir ǵana pýnkt – zııandy sózderdiń enip ketpeýi máselesiniń ózi qandaı kókeıkesti. Bir sóz ıa ósiredi, ıa óshiredi. Býlıng, sýıtsıd degenniń túp tamyry sonda demeske laj joq. Oqýshylar oqý betterinen qanattanyp, durys baǵdar alyp, ómirge degen qulshynystary qaıralyp shyǵýy kerek. Bul máseleler Ortalyqtyń da udaıy nazarynda», - dep atap ótti ol.
Ǵanı Beısembaevtyń aıtýynsha, bilim sapasy oqýlyq sapasyna tikeleı baılanysty bolǵandyqtan, kelesi kezeńde aldyńǵy ketken olqylyqtardyń ornyn toltyrý mindeti tur. Bilim sapasyn baqylaý memlekettik bilim standarttarynan bastap oqýshylardyń bilim nátıjelerin baǵalaýǵa deıin úzdiksiz algorıtmge saı, júıeli monıtorıng júrgizý, baǵalaý, taldaý, usynymdar berý túrinde júrgizilýi tıisti. Sonda ǵana naqty nátıje bolmaq.
Sondaı-aq, Ǵanı Beısembaevtyń baıandaýyna qaraǵanda, osy maqsatta bıyl bes baǵyttaǵy jumystar qolǵa alynǵan:
- birinshiden, oqýlyqtarǵa qatysty normatıvtik quqyqtyq aktilerge ózgerister engizilip, QR «Bilim týraly» Zańynyń jobasyna 4 baǵytta tolyqtyrýshy tujyrymdar usynyldy;
- ekinshiden, oqýlyqtardy saraptaýdyń Jańa júıesi ázirlenip, saraptaýdyń qupııalylyǵy men obektıvtiligin kodtaý arqyly arttyrý boıynsha jumystar júrgizilgen. Mysaly, osyǵan oraı tıisti bólim óz qyzmetin atqarýda. Budan bólek, ortalyqta arnaıy Psıholıngvıstıkalyq jáne psıhodıdaktıkalyq saraptamany ádisnamalyq qamtamasyz etý jáne Etnomádenı saraptamany ádisnamalyq qamtamasyz etý bólimderi ashylǵan;
- úshinshiden, syrtqy sarapshylar bazasyn qalyptastyrý men olardy sarapshylar quramyna iriktep alý talaptary aıqyndalǵan. ıAǵnı, budan bylaı kóptegen syndardan súrinbeı ótken úzdikter ǵana sarapshylar bazasyna enedi.
- tórtinshiden, elektrondyq platformany engizý basymdyǵyna qozǵaý berildi. Dál bul baǵytqa artar úmit zor. Sebebi avtomattandyrý saraptama jumysynyń sapasy men ýaqyt faktorlaryna áser etip otyrǵan kóptegen qıyndyqtardyń túıinin sheshkeli otyr.
- besinshiden, ashyqtyq pen qoǵamdyq baqylaý jolǵa qoıyldy. Jýyrda ortalyqtyń janynan bilim berý salalary, bıznes, bılik jáne azamattyq qoǵam qurylymdary arasynda turaqty dıalog ornatýǵa jáne qoldaýǵa baǵyttalǵan arnaıy Ashyq qoǵamdyq-saraptamalyq platforma quryldy. Ol uıymnyń ashyqtyǵy men qoǵamdyq baqylaý, jurtshylyqpen baılanysty qamtamasyz etýge baǵdarlanǵan. Qoǵam belsendisi Murat Ábenov jetekshilik etetin bul topta Bıbigúl Jeksenbaı, Zeıin Álipbek, Irına Smırnova syndy azamattar bar.
Sondaı-aq, quramyna kórnekti ǵalymdar, qoǵam qaıratkerleri, ǵylymı zııaly qaýym ókilderi kiretin, bilim mazmunynyń sapasyn jaqsartýdyń ózekti máselelerin ǵylymı-ádisnamalyq turǵydan talqylaıtyn jáne usynystardy qabyldaýdy uıymdastyratyn, osy turǵyda ortalyq qyzmetiniń sapasynyń artýyna yqpal ete alatyn Ǵylymı-ádisnamalyq keńesi de jumys júrgizýde. Munda da Ǵarıfolla Esim, Jaýymbaı Qaraev, Faýzııa Orazbaeva, Talas Omarov tárizdi moıyndalǵan ǵalymdar bar.