Ǵanı Beısembaev dırektordyń jeke dárethanasy týraly daýǵa pikir bildirdi

<p>ASTANA. KAZINFORM &ndash; Oqý-aǵartý mınıstri Ǵanı Beısembaev mektepterdegi syrtqy dárethana máselesi qalaı sheshilip jatqanyn aıtyp berdi.</p>

«Almaty oblysy Tóńkeris aýylynda túsirilgen vıdeo áleýmettik jelige tarady. Onda mektep dırektory óziniń jeke dárethanasyn ashyp alǵan. Al júzden astam muǵalim bir ájethanaǵa barady. Bul oqıǵadan habaryńyz bar ma?», - dep suraq qoıdy tilshiler.

Mınıstr bul bir ǵana jaǵdaı ekenin jáne máseleni bilim basqarmasy qatań baqylaýda ustap otyrǵanyn aıtty.

«Birinshi anyqtap alaıyq. Oqıǵanyń qanshalyqty ras ekeni, óndiriske, bilim sapasyna, mektep jumysyn úılestirýge keltirilgen basqa da zalaldary anyqtalsa, tıisti qatań sharalar qoldanylady. Tekserý sońyn kútken durys dep oılaımyn», - dep jaýap berdi Oqý-aǵartý mınıstri.

Jalpy mekteptegi dárethana taqyryby únemi qoǵam narazylyǵyn týdyryp keledi. Mınıstr jańa oqý jylynda syrttaǵy dárethanalar tolyǵymen joıylatynyn aıtty.

«2021 jyly osy másele kóterilgende mektep syrtyndaǵy dárethanalar sany 2 700-di quraǵan edi. Búgingi kúni atqarylǵan is-sharalar nátıjesinde 10 ájethananyń ǵana syrtty ornalasqany anyqtalyp otyr. Budan bólek, mektep ishindegi jyly ájethanalar bolǵanyna qaramastan, syrttaǵy ájethanalardy tolyqqandy jabylmaǵanyn kórip otyrmyz. Bul baǵytta jergilikti atqarýshy organdarǵa tıisti tapsyrmalar berildi. Jazdyń úsh aıynda maksımaldy túrde bul máseleni tolyqandy sheshýge tyrysamyz. Deı turǵanymen alys jerlerde 10-20 bala oqıtyn mektepter bar. Ol mektepterde ishki ájethana ornatýǵa qatysty sheshilmegen máseleler túıinin bıyl sheshý josparlanýda», - dep tolyqtyrdy Ǵ. Beısembaev.