Ǵanı Beısembaev: Búgin 90 myńǵa jýyq oqýshy sý jańa mektepte oqý jylyn bastaıdy
Mınıstr memleket oqýshylardyń sapaly bilim, sanaly tárbıe alýy úshin barlyq jaǵdaıdy jasap jatqanyn, búgin 90 myńǵa jýyq oqýshy sý jańa mektepterde oqý jylyn bastaıtynyn atap ótti.
«Qadirli ustazdar, ata-analar jáne oqýshylar! Búgin 2024-2025 oqý jylynyń jańa paraǵy ashyldy. Elimizdiń barlyq óńirlerinde Bilim kúnin asyǵa kútken 3,9 mln bala súıikti mektebimen, ustazdarymen qaıta qaýyshty. Memleket oqýshylardyń sapaly bilim, sanaly tárbıe alýy úshin barlyq jaǵdaıdy jasap jatyr. Búgin 90 myńǵa jýyq oqýshy sý jańa mektepterde oqý jylyn bastaıdy. Onyń ishinde «Jaıly mektep» ulttyq jobasymen salynǵandary da bar. Al 200 myńnan astam bala kúrdeli jóndeýden ótip, qaıta jabdyqtalǵan mektepterde bilim alady. 1 qyrkúıek – alǵash ret mektep tabaldyryǵyn attaǵan balalar úshin erekshe mereke. Birinshi synypqa 352 myń bala qabyldandy. Al 11 synypqa ótken 219 myń oqýshy mekteptegi oqýyn aıaqtaıdy. Qymbatty balalar, oqý jyly sizderdi jańa jetistikterge jetelep shabyttandyratyn qyzyqty, tanymdy ári taǵylymdy bolsyn dep tileımin! Dál osy kúni ustazdardyń óskeleń urpaqqa bilim men tárbıe berýdegi orasan eńbegin de atap ótkim keledi. Ulttyń aǵartýshy uly tulǵasy Ahmet Baıtursynuly «Ustaz - ult kelbeti» dep beker aıtpasa kerek. Sondyqtan aǵartýshylyq mıssııasyn adal atqaryp júrgen ustazdardyń eńbegi laıyqty túrde joǵary baǵalanýy tıis. Qurmetti áriptester, óz mamandyqtaryńyzǵa adaldyqtaryńyz, urpaq isindegi jankeshti eńbekterińiz úshin alǵysymdy bildiremin. Sizder balalarǵa bilim berip qana qoımaı, olarǵa halqymyzdyń basty qundylyqtaryn sińirip kelesizder. Bıylǵy oqý jyly joǵary jetistikter men tolaǵaı tabystarǵa toly bolsyn! Bilim kúni qutty bolsyn!» - delingen mınıstr quttyqtaýynda.
Buǵan deıin jańa oqý jylynda qandaı ózgerister bar ekenin jazǵan bolatynbyz.