Gandboldan Olımpıadaǵa irikteý: Qazaqstan quramasy jeńilip qaldy

NUR-SULTAN. QazAqparat - Gandboldan Qazaqstan áıelder quramasy Olımpıadaǵa irikteý satysyndaǵy alǵashqy kezdesýin ótkizdi, dep habarlaıdy QazAqparat tilshisi.

Іrikteý oıyndary Majarstanda ótýde. Qazaqstannyń qarsylastary - Majarstan, Reseı jáne Serbııa quramalary.

Alǵashqy oıynynda qazaqstandyq gandbolshylar Majarstan quramasymen kezdesti. Bul kezdesýde alań ıeleri basymdyq tanytty. Osylaısha quramamyz qarsylasyna 19:46 esebimen jol berdi. Alǵashqy týrda Reseı Serbııany 29:24 esebimen tize búktirdi.

Endi qazaqstandyq gandbolshylar búgin, 20 naýryzda Reseı, 21 naýryzda Serbııamen kezdesedi.

Esterińizge sala ketelik, quramamyz 2008 jyly Olımpıada oıyndarynda baq synap, jalpy komandalyq esepte onynshy orynǵa taban tiregen bolatyn.

Aıta keteıik, Qazaqstan Tokıo Olımpıadasyna 100 joldama ıelenýdi josparlap otyr.