Gandbol: Qazaqstan sportshylary Azııa chempıonatynda alǵashqy týrdan súrindi

<p>Bahreın memleketiniń Manama qalasynda ótip jatqan qol dobynan erler arasyndaǵy XXI Azııa chempıonatynyń alǵashqy týrynda Qazaqstan quramasy alań ıelerinen jeńilip qaldy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Sportty damytý dırektsııasynyń baspasóz qyzmeti málim etkendeı, alǵashqy taım 7-24 esebimen aldyńǵy chempıonattaǵy kúmis júldegerdiń aıqyn basymdyǵymen aıaqtaldy. Ekinshi kezeńde Bahreın oıynshylary taǵy 23 gol salyp, iri jeńiske qol jetkizdi. Esep: 13-47.

D tobyndaǵy taǵy bir machta BAÁ-niń quramasy Gonkongtan 29-24 esebimen aılasyn asyrdy. Erteń, 13 qańtarda Qazaqstan men BAÁ arasyndaǵy match ótedi (Astana ýaqytymen 18:00-de bastalady). Sosyn, 15 qańtarda toptaǵy sońǵy týrda qazaq gandbolshylary Gonkongpen kúsh synasady.

Aıta keteıik, chempıonat nátıjesinde 2025 jyly qysta Horvatııa, Danııa men Norvegııada ótetin 4 qurama álem chempıonatyna joldama alady.

Bahreın osyǵan deıin Azııa chempıonatyn 1993, 2014 jáne 2016 jyly qabyldaǵan. Qazirgi chempıon – Qatar qatarynan 5 Azııa chempıonatynda (2014, 2016, 2018, 2020 men 2022 jyly) top jarǵan.

Ulttyq qurama oıynshylarynyń tizimi:

Qýanbaı Qýantyr, Danııar Irısmetov, Áset Qalı, Asylhan Nábıev, Erjan Kenjebaev, Konstantın Mılıaev, Dáýren Tilekqabyl, Bekzat Anarbaev, Odıljan Gazıev, Ilıa Pobochenko, Mıras Qaldyhan, Danııl ıAkýbovıch, Asqan Óksikbaev, Dılmýrad ıÝldashev, Artem Melnıchenko, Vıktor Mıhaılov.