Ǵalymjan Pirmatov ulttyq tólem júıesi qashan iske qosylatynyn aıtty

NUR-SULTAN. QazAqparat – Ulttyq tólem júıesin 2022 jyldyń 1 shildesinde iske qosý josparlanǵan. Bul týraly QR Ulttyq bankiniń tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Memleket basshysynyń tapsyrmasyn oryndaý úshin Ulttyq bank 2021 jylǵy qarashada Ulttyq tólem júıesiniń komponentteri – kartochkalyq tranzaktsııalardy óńdeý úshin tólem kartochkalarynyń bankaralyq júıesin jáne mobıldi onlaın tólemderge qyzmet kórsetý úshin lezdik tólemder júıesin pılottyq rejımde iske qosty», - dedi Ǵalymjan Pirmatov Úkimettiń keńeıtilgen otyrysynda.

Onyń atap ótýinshe, ulttyq tólem júıesiniń jumys isteýine qajetti normatıvtik-quqyqtyq baza ázirlendi.

Júıeni tolyq kólemde iske qosý osy jylǵy 1 shildege josparlanyp otyr.

«2021 jyly Ulttyq bank tsıfrlyq teńgeni engizý jónindegi pılottyq jobaǵa bastamashy boldy. Qazirgi ýaqytta platformanyń prototıpin ázirleý aıaqtaldy. 2021 jylǵy jeltoqsanda pılottyq jobanyń nátıjesi boıynsha qorytyndy baıandama jarııalandy. Bıyl paıda men shyǵasylardy baǵalaı otyryp, tsıfrlyq teńgeni engizý modeli boıynsha qorytyndy sheshim ázirlenetin bolady», - dedi UB tóraǵasy.