Ǵalymjan Pirmatov Ulttyq qor tabysyn arnaýly esepshotqa aýdarýǵa qatysty pikir bildirdi

NUR-SULTAN. QazAqparat – Ulttyq bank Úkimet Ulttyq qordyń ınvestıtsııalyq tabysynyń 50 paıyzyn arnaýly esepshotqa aýdarý boıynsha tehnıkalyq máselelerdi birlese pysyqtap jatyr. Bul týraly QR Ulttyq bank tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Bul usynysty iske asyrýǵa qatysty Ulttyq banktiń tıisti qadamdary bar. Prezıdent bul jumystar kúrdeli ekenin túsine otyryp, óziniń tapsyrmasyn naqty júktedi. Osy oraıda 2024 jyldan bastap bul tapsyrmany júzege asyrý kerek ekeni aıtyldy», - dedi Ǵ. Pirmatov elordada ótken baspasóz máslıhatynda.

Onyń aıtýynsha, qazirgi kezde atalǵan máseleniń tehnıkalyq mán-jaıy talqylanyp jatyr.

«Qazir Úkimetpen birlese tapsyrmany tehnıkalyq turǵyda durys ári ońtaıly oryndaý jaǵyn pysyqtap otyrmyz. Meniń oıymsha, birlesken sheshim qabyldanǵan jaǵdaıda, ony el halqyna jarııalaımyz», - dedi UB basshysy.

Budan buryn habarlanǵandaı, Memleket basshysy óz Joldaýynda Ulttyq qordyń jyl saıynǵy ınvestıtsııalyq tabysynyń 50 paıyzyn balalardyń arnaýly jınaqtaýshy esepshotyna aýdarýdy usyndy.

«Qarjy ár bala 18 jasqa tolǵanǵa deıin aýdarylyp turady, ony merziminen buryn esepshottan shyǵaryp alýǵa bolmaıdy.

Jınaqtalǵan qarjy balalar kámelet jasyna tolǵannan keıin olardyń baspana nemese bilim alýyna jumsalatyn bolady.

Bul qarajat óskeleń urpaqtyń úlken ómirge qadam basýyna múmkindik beredi. Qor, shyn máninde, ulttyq mártebege ıe bolyp, halqymyzdyń ıgiligine qyzmet etedi. Bastamany muqııat ázirleý qajettigin eskere otyryp, jobany 2024 jylǵy 1 qańtardan bastap iske qosýdy tapsyramyn», - dedi Qasym-Jomart Toqaev.