Ǵalymjan Pirmatov teńgeniń nyǵaıýyna ne áser etkenin aıtty

NUR-SULTAN. QazAqparat – Mamyr aıynda teńge 6,8 paıyzǵa nyǵaıdy. Bul týraly búgin Úkimet otyrysynda Ulttyq bank tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Mamyrda jahandyq qarjy naryqtaryndaǵy belgisizdik pen qubylmalylyqqa qaramastan teńge baǵamy 1 AQSh dollary úshin 415,16 teńgege deıin nemese 6,8 paıyzǵa nyǵaıdy. Ulttyq valıýtanyń nyǵaıýy munaı-gaz naryǵyndaǵy joǵary baǵa men eksporttaýshylardyń salyq tólemderine, jeke tulǵalardyń shetel valıýtasyna suranysy tómendegendikten naryq qatysýshylary sentımentiniń ózgerýine, Reseı rýbli baǵamynyń nyǵaıýyna baılanysty», - dedi Ulttyq bank tóraǵasy.

Ǵalymjan Pirmatovtyń atap ótýinshe, valıýta naryǵyndaǵy usynys kvazımemlekettik sektor sýbektileriniń valıýtalyq túsimin satýy esebinen qosymsha qoldaý tapty. Onyń kólemi mamyrda shamamen 598 mln dollar boldy.

«Bıýdjetke iri salyq tólemderi kezeńi men valıýtany satýdyń tıisti qajettiligi aıasynda shetel valıýtasynyń usynysy suranystan asyp tústi. Salyq aptasy kezeńinde ótimdilikti qoldaý jáne shetel valıýtasynyń suranysy men usynysy arasynda qalyptasqan teńgerimsizdikti retteý maqsatynda Ulttyq Bank 110,5 mln dollarǵa shetel valıýtasynyń artyq usynysyn satyp aldy», - dedi ol.