Ǵalymjan Eleýov Májilistegi ókilettigin toqtatýǵa ózi ótinish bergen

ASTANA. QazAqparat – Búgin Parlament Májilisiniń jalpy otyrysynda depýtat Ǵalymjan Eleýovtiń ókilettigi merziminen buryn toqtatyldy, dep habarlaıdy QazAqparat tilshisi.

«Parlament Májilisiniń depýtaty Ǵalymjan Almasbekuly Eleýov mindetterin atqarýdan óz erkimen bosatý týraly ótinish berdi. Osyǵan oraı Ortalyq saılaý komıssııasy sizderdiń nazarlaryńyzǵa Konstıtýtsııanyń 52-babyna, «Qazaqstan Respýblıkasynyń Parlamenti jáne onyń depýtattarynyń mártebesi týraly» Konstıtýtsııalyq Zańnyń 24-baby 3 jáne 8-tarmaqtaryna sáıkes, Májilis depýtaty Ǵ Eleýovtiń ótinish berýine baılanysty onyń ókilettiligin merziminen buryn toqtatý týraly máseleni sheshý úshin usynym engizip otyr», - dedi Ortalyq saılaý komıssııasynyń hatshysy Muhtar Erman.

Jalpy otyrysta palata depýtattary atalǵan usynymǵa daýys berip, Ǵalymjan Eleýovtiń ókilettigin merziminen buryn toqtatý týraly sheshim qabyldady.

Budan buryn habarlanǵandaı, QR Ortalyq saılaý komıssııasy QR Parlamenti Májilisiniń depýtaty Ǵ.A. Eleýovtiń ókilettigin toqtatý týraly qaýly shyǵardy.