Ǵalymdardyń jalaqysy jyl saıyn 20 paıyzǵa artady
«Otandyq ǵylymdy damytý úshin Úkimet júıeli is-sharalardy qabyldaýda. Ǵalymdarmen jáne sarapshylarmen birlesip, biz joǵary bilim jáne ǵylymdy damytýdyń 2029 jylǵa deıingi jańa tujyrymdamasyn ázirlep bekittik, jaqynda. Onyń aıasynda ǵalymdardyń sanyn 1,5 esege ulǵaıtý, ǵylymı ınstıtýttardy damytý, ǵylymı-zertteýlerdi kommertsııalandyrý, jastardy ǵylymǵa tartý jáne ýnıversıtet ǵylymyn damytý kózdeledi», - dedi Álıhan Smaıylov.
Onyń atap ótýinshe, Memleket basshysynyń tapsyrmasyna sáıkes, ǵylymdy qarjylandyrý 2020 jylǵy 89 mıllıard teńgeden bıyl onyń kólemi 160 mıllıard teńgege deıin ulǵaıtyldy. 2025 jylǵa qaraı qarjylandyrý kólemin 240 mıllıard teńgege deıin arttyrý josparlanyp otyr. Ótken jyly ǵalymdardyń jalaqysy eki ese ósti. Bıyl 20 paıyzǵa kóbeıdi, aldaǵy jyldary jyl saıyn 20 paıyzǵa artady.
«Granttar konkýrsynyń qorytyndysyna qaramastan, bazalyq qarjylandyrý aıasynda 700 ǵalym jalaqymen qamtamasyz etildi. Іrgeli ǵylymǵa qarajat granttar konkýrsynan tys bólinedi. Ulttyq ǵylymı keńester sheshimderiniń obektıvtiligi arta tústi, apellıatsııalyq komıssııa quryldy. Qazaqstannyń ǵalymdary jyl saıyn álemniń jetekshi ǵylymı ortalyqtaryna taǵylymdamadan ótýge jiberiledi. Jas ǵalymdarǵa 1000 grantqa deıin bólinedi. 2020 jyly 40 jasqa deıingi jas ǵalymdardyń úlesi 38 paıyz bolsa, búginde bul kórsetkish 46 paıyzǵa jetti. Jobalardy kommertsııalandyrý úlesi 27 paıyzǵa artty. Qazaqstan Respýblıkasynyń Prezıdenti janyndaǵy Ulttyq ǵylym akademııasynyń mártebesi joǵarylady», - dedi Úkimet basshysy.