Ǵalymdar jol qurylysynda jańa tásil qoldanbaq – QR IIDM

ASTANA. QazAqparat - «Qazaqstan jol ǵylymı-zertteý ınstıtýty» AQ ǵalymdary Atyraý oblysyndaǵy aımaqtyq mańyzy bar joldardyń qurylysynda jergilikti materıaldardy paıdalanýdyń jańa tehnologııasyn qoldanatyn bolady, dep habarlaıdy QR IIDM baspasóz qyzmeti.

Sondaı-aq jol tóseminiń tabıǵı beriktigin arttyrý úshin jergilikti klımattyq jaǵdaılar men jer qyrtysynyń qurylymy da nazarǵa alynady.
Buǵan deıin Indýstrııa jáne ınfraqurylymdyq damý mınıstri Qaıyrbek Óskenbaev Atyraý oblysyna is-saparmen barǵan kezde shalǵaıdaǵy eldimeken turǵyndary joldyń syn kótermeıtini týraly aryz-shaǵymyn jetkizgen bolatyn. Atap aıtqanda, Azǵyr óńirindegi jergilikti mańyzy bar joldyń ahýaly tóńireginde sóz qozǵaǵan azamattar mınıstrge joldyń sapaly salynýy úshin tıisti shara qabyldaý qajettigin tapsyrǵan edi. Qaıyrbek Aıtbaıuly atalǵan máseleni jeke baqylaýyna alatynyn aıtyp, ǵalymdarmen birlese ǵylymı turǵyda klımattyq erekshelikti eskere otyryp, jol salý tehnologııasyn qaıta qaraıtynyn ýáde etken.

Endi mine, ınnovatsııalyq tehnologııa alǵash ret Atyraý oblysynyń Azǵyr óńirindegi avtomobıl jolyn ortasha jóndeý jumystarynda qoldanylmaq. Qurmanǵazy aýdanynda ótken qoǵamdyq tyńdaýda osy másele egjeı-tegjeıli talqylandy. Basqosýǵa mınıstrdiń tikeleı tapsyrmasymen qurylǵan top, ıaǵnı, Qazaqstan jol ǵylymı-zertteý ınstıtýtynyń ǵalymdary, sondaı-aq jergilikti atqarýshy organ ókilderi men aýdandyq qoǵamdyq keńes músheleri qatysty.

Jıynda «Qazaqstan jol ǵylymı-zertteý ınstıtýty» AQ Avtomobıl joldary jáne kópir qurylymdary departamentiniń dırektory Ashat Baıbatyrov Azǵyr óńirindegi jer bederiniń ereksheligine nazar aýdaryp, jol qurylymyna zııandy protsestiń aldyn alatyn jańa tehnologııalardyń zerdelenip jatqanyn atap ótti.

«Bul avtomobıl joly besinshi kategorııaǵa jatady. Azǵyr aımaǵy Naryn qumynda ornalasqandyqtan, mundaǵy jol ýchaskelerinde qum, saz jáne sor kezdesedi. Sondyqtan da jóndeý jumystaryn bir jobamen júrgizý múmkin emes. Osy máseleni sheshý úshin mınıstrlik jol ýchaskesinde jańa tehnologııalardy engizýdi tapsyrdy. Ol oń nátıjesin berse, ınnovatsııalyq sheshim óńirdegi ózge de jol jóndeý jumystarynda qoldanylatyn bolady», – dep atap ótti Ashat Baıbatyrov.

Atalǵan aımaqtaǵy avtomobıl jolyn jóndeý jumystary ótken jyly bastalǵan bolatyn. Buǵan deıin 36 shaqyrymnan astam jol tósemi tóseldi. Al bıyl jol ýchaskesiniń qalǵan bóliginiń jobasy jasalyp, jóndeý jumystary júrgizilýde. Ǵalymdar rekonstrýktsııalaý jumystaryna jergilikti qurylys materıaldaryn qoldanýdy da qarastyrýda.

«Jol salasynda jergilikti materıaldarǵa basymdyq berý – el ekonomıkasyna oń áser tıgizetini belgili. ıAǵnı, ony tasymaldaý kezindegi qyrýar shyǵyndar azaıady», – deıdi mamandar.