Ǵalymdar Jaıyq popýlıatsııasynyń 10 kıigin spýtnık arqyly baqylaıdy

NUR-SULTAN. QazAqparat – Qazaqstan bıoártúrlilikti saqtaý qaýymdastyǵy (QBSQ) men QR BǴM «Bıologııalyq qaýipsizdik máseleleri ǵylymı-zertteý ınstıtýty» (BQM ǴZI) RMK birlesken ekspedıtsııasy Batys Qazaqstan oblysynda 10 kıikke GPS sensory bar moıynbaý taqty, dep habarlaıdy QazAqparat qaýymdastyq saıtyna silteme jasap.

15 qarashada bastalǵan ekspedıtsııa barysynda zertteýshiler barlyǵy 12 bókendi ustady. Olardyń ishinde 3 jastan aspaǵan 10 urǵashy kıikke GPS trekkerin taqty, eki saıǵaqtan (tekesi) bıomaterıal synamalary alyndy.

Júırik dala kıikterin ustap alý ońaı emes, olardy qolǵa túsirý QBSQ-nyń 2009 jylǵy tásilimen júrgizildi.

Bul jumystar QBSQ men BQM ǴZI arasyndaǵy ǵylymı seriktestik týraly kelisim aıasynda iske asyryldy. Tańbalanǵan kıikterdi eki uıym da baqylap otyrady. QBSQ – mıgratsııa men kúzet joldaryn qadaǵalasa, ınstıtýt – kıikterdiń aýrýyn zertteýmen aınalyspaq.

Janýarlardy aýlaýǵa QBSQ, BQM ǴZI, «Ohotzooprom» ÓB jáne QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar álemi komıteti oblystyq aýmaqtyq ınspektsııasynyń qyzmetkerleri qatysty.