Ǵalymdar sotta kýálik ete almaıtyndardyń tizimin keńeıtýdi usynyp otyr

ASTANA. QazAqparat - Búgin Astanada ótken kýágerler men jábirlenýshilerdiń quqyqtaryn qorǵaý máselesine arnalǵan jıynda QR Bas prokýrorynyń kómekshisi Serik Temirbolatov atap ótkendeı, búginde adamnyń týǵan-týystary sotta kýálik ete almaıdy.

Degenmen, atalǵan tizimge joldas, synyptas, kórshi-qolań sııaqty jaqyn adamdardy da qosý qajet, dep esepteıdi ol.

«Dál osy másele ǵalymdar arasynda qyzý talqylanyp jatyr. Nege deseńiz, qazirgi kezde kýágerlik ımmýnıteti bar adamdardyń tizimi bekitilgen, ıaǵnı olar sotta kýágerlik ete almaıdy. Degenmen, dostar, synyptastar, grýppalastar, kórshi-qolań sııaqty jaqyn adamdarda ondaı ımmýnıtettiń bolmaýy aıqyn dálelderdi alýǵa kedergi keltirip, sot ádildigine keri áserin tıgizedi. Máselen, sizdi meniń dosym retinde maǵan qarsy aıǵaq berýge shaqyrdy deıik. Sonda siz ishteı meni oılap, tergeýdi múldem basqa jaqqa alyp ketýińiz ábden múmkin ǵoı. Iá, ol zańǵa qaıshy. Ondaıdy jalǵan aqparat berý deıdi. Degenmen, ol áreketti aldymen dáleldeý kerek. Mine, sol sebepti kýágerlik ımmýnıteti bar adamdardyń qataryna týǵan-týystarmen birge dos-jaran sııaqty jaqyn adamdardy da qosý týraly usynys bar», - deıdi S.Temirbolatov.

Onyń aıtýynsha, adam óz dosyna qarsy ashyq ári naqty aıǵaq bergen kúnniń ózinde onyń arty úlken daý-damaılarǵa ulasyp jatady. Eki dostyń otbasylary arasynda kıkiljińder týyndaıdy. Osyǵan baılanysty ǵalymdar sotta kýálik ete almaıtyndardyń tizimin ulǵaıtýdy usynyp otyr.