Ǵalymdar Qazaqstannyń kıeli áskerı oryndar kartasyn jasaýdy usyndy
«Bizde kıeli geografııalyq oryndar kóp. Ondaı oryndarǵa sarbazdar jerlengen jerlerdi aıtpaǵanda, tipti qaladaǵy nysandar, Máńgilik alaý, Jeńis saıabaqtary, 1941-45 jyldary jaýyngerler soǵysqa attanǵan vokzaldardy da engizýge bolady. Biz Qorǵanys mınıstrligine hat joldap, qazaqstandyq áskerı memorıaldardyń kıeli kartasyn jasaýǵa kómektesý týraly usynys jasamaqpyz. Ondaı oryndar bizde bar. Mysaly, Almatydaǵy burynǵy AHBK kombınaty aýmaǵy 1941 jyly qalanyń sheti bolyp eseptelgen. Sol jerde panfılovshylar polki jasaqtalǵan. 36-shy mektep ornynda soǵys kezinde medsanbat ornalasqan. Talǵarda dıvızııalar jasaqtalǵan oryndar bar. Bul iste bizge Aýǵan soǵysy ardagerleri men Generaldar keńesi kómektesedi» - dedi QazAqparat tilshisine tarıh ǵylymdarynyń doktory, professor Laıla Ahmetova.
Aıta keteıik, 2-shi Dúnıejúzilik soǵys kezinde sońǵy derekter boıynsha 1 196 164 adam shaqyrtylǵan. Maıdan dalasynda 601 939 qazaqstandyq qaza tapty. Qazirgi ýaqytta Almaty qalasynda qalalyq ardagerler keńesinde 216 myń zeınetker bar. Qalada 670 ardagerler uıymy tirkelgen.