Ǵalymdar, aqyn-jazýshylar men jýrnalıster repressııaǵa ne úshin ushyrady

AQTÓBE. QazAqparat - Qazaqstanda repressııaǵa ushyraǵan ǵalymdardy, aqyn-jazýshylardy, jýrnalıster men qoǵam qaıratkerlerin aqtap alýǵa qatysty jumys jalǵasyp jatyr. Bul másele respýblıkalyq semınarda talqylandy, dep habarlaıdy QazAqparat tilshisi.

«Biz qazir ǵalymdardyń, jazýshylar men sýretshilerdiń, rejısserlerdiń ómir joly men eńbegin baǵamdap jatyrmyz. Olardyń shyǵarmalary men ǵylymı zertteýlerindegi ulttyq kózqaras, qazaq halqynyń quqyǵy men bodandyqtan bosap shyǵýǵa, táýelsizdikke úndeýi, Respýblıka terrıtorııasynyń bútindigin saqtaýǵa shaqyrǵany qaralady. Osy úshin de olar túrli qýǵyn-súrginge ushyraǵan», - dedi respýblıkalyq semınardyń moderatory, qýǵyn-súrgin qurbandaryn tolyq aqtaý jónindegi respýblıkalyq komıssııa múshesi, Ulttyq komıssııanyń jobalyq keńsesiniń jetekshisi Sabyr Qasymov.

Sondaı-aq ol repressııaǵa ushyraǵandardy atady:
- ǵylymı ıdesy úshin (ekonomıst Ázimbaı Lekerov, tarıhshylar Ermuhan Bekmahanov, Bekejan Súleımenov, Álkeı Marǵulan jáne t.b);

- bostandyq pen ulttyq qundylyqty saqtaý jáne halyqtyń quqyǵyn ashyq aıtyp, úgit-nasıhat júrgizgeni úshin (aqyn jáne jýrnalıster Maqsut Taıshybaev, Isa Toqtybaev, Eleýsiz Buırın jáne t.b);
- Goloşekınniń reformasyna qarsy shyqqany úshin (memleket qaıratkeri Smaǵul Sádýaqasov, Sultanbek Hodjanov, Jalaý Myńbaev, Ydyrys Mustambaev jáne t.b);
- respýblıka terrıtorııasyn saqtaýǵa úndegeni úshin (Alash qaıratkerleri – Álıhan Bókeıhanov, Ahmet Baıtursynov, Álimhan Ermekov, Ýálıthan Tanashev, Aıdarhan Turlybaev, Mustafa Kókebaev, Smaǵul Sádýaqasov, Jumabek Táshenev jáne t.b.).
- «qazaq ultshyldarymen» baılanysta bolǵan ózge ult ókilderi (qoǵam qaıratkeri Tımofeı Sıdelnıkov, qazaq poezııasyn tárjimalaǵan aýdarmashy ári ádebıettanýshy Aleksandr Jovtıs, mýzyka zertteýshisi Aleksandr Zataevıch jáne t.b).