Ǵalymdar adamnyń kóz jasy týraly zertteý jasady

NUR-SULTAN. QazAqparat - «Kóz jasyńa erik ber, jeńildep qalasyń». Dál osy sózderdi jıi estımiz jáne jylap alsaq, jeńildep qalatynymyzǵa senemiz. Kópshiliktiń aldynda jylaý, sondaı-aq, álsizdiktiń kórinisi. Ǵalymdardyń aıtýynsha, bul eki túsinik te 100 paıyz durys emes, dep habarlaıdy VVS.

Basylymnyń habarlaýynsha, Aýstralııadaǵy Kvınslend ýnıversıtetiniń psıhologtary zertteý júrgizgen. Lı Sharmen jáne onyń áriptesteri tarıhta alǵash ret adamnyń kóz jasyn tekseretin test oılap tapty. «Adamdardyń kózinshe jylaý durys pa? Onyń qandaı saldary bolýy múmkin?» degen saýal joldap, eriktilerdiń jaýabyn jınaqtaǵan. Nátıjesinde 40 túrli sheshim shyǵarǵan.

Odan keıin júzge jýyq adamnyń basyn qosyp, ǵalamtor arqyly psıholog ǵalymdar saýalnama ótkizedi. Basylymnyń aıtýynsha, Sharmen bastaǵan ǵalymdar osy zertteýdiń nátıjesinde mynadaı 3 sheshim shyǵarǵan:

- Ońashada jylap alý paıdaly.

- Ońashada jylaýdyń túk paıdasy joq.

- Kópshiliktiń kózinshe jylaýdyń da esh paıdasy joq.

ıAǵnı, zertteýshiler ońashada jylaýdyń paıdaly ıa paıdasyz bolýy adamnyń minezi men kózqarasyna baılanysty deıdi.

Al amerıkalyq psıholog Rendolf Kornelıýs 1985 jyldan beri BAQ betterine shyqqan adamnyń kóz jasy týraly 72 maqalany saraptap, onyń 94 paıyzynda kóz jasyna erik berýdiń paıdaly dep jazylǵanyn dáleldedi.

Basylymnyń habarlaýynsha, tanymal brıtan psıhıatry Genrı Modslı «emotsııany syrtqa kóz jasy arqyly shyǵarmaý kóptegen ishki organdardyń aýrýyna alyp keledi» dep jazǵan.

Al kópshiliktiń aldynda jylaý týraly Sharmen bastaǵan ǵalymdar toby ne deıdi? 2016 jyly júrgizilgen tájirıbe boıynsha, «jylaýyq áriptesti» ujymda jumysqa qabiletsiz dep baǵalaǵan. Bul tájirıbege qatysqandar sýret arqyly jylap otyrǵan erler men áıelderge baǵa bergen.