Ǵalymdar 13 jyl buryn Marsta joǵalǵan apparatty tapty

ASTANA. QazAqparat - London Ýnıversıtettik kolledjiniń ókilderi Mars betiniń jańa sýretterin tanystyrdy. Bul sýretterden joǵalǵan «Bıgl-2» qondyrý modýlin kórýge bolady. Bul týraly kolledjdiń resmı saıtynda habarlandy.

Sýretterdi túsirý úshin zertteýshiler Gotcha-PDE-TV tehnologııasyn paıdalandy.

Avtorlar kórsetken sýretter Mars Reconnaissance Orbiter ǵarysh apparatynyń bortyna ornatylǵan HiRISE kamerasy arqyly jasalǵan. HiRISE kamerasy 300 km bıikten 30 sm zatty ajyrata alady.

Olar sýret túsirýdiń qanyqtylyǵyn arttyryp, 5 sm zatty ajyrata alatyndaı ózgertti.

Tehnologııany qurastyrýshylar eki sýretti jurt nazaryna usynyp otyr. Birinshisinde 2004-2010 jyldary Marsta júrgen SPIRIT kóliginiń izderin kórýge bolady.

Sondaı-aq ǵalymdar boljam boıynsha «Bıgl-2» modýli qonǵan jerdiń qanyqtyǵy joǵary sýretterine qol jetkizdi. Sýretten Y-pishindi zattyń nyshanyn baıqaýǵa bolady. Zertteýshilerdiń paıymynsha, bul ǵarysh apparaty.

Zertteýshiler sýrettermen jumys jasaýdy jalǵastyryp, ózge sýretterdiń sapasyn jaqsartpaq.