Ǵalym Jumaǵalı Ysmaǵulov turǵan úıge eskertkish taqta ashyldy

ALMATY. QazAqparat - Almaty qalasynda kórnekti qoǵam qaıratkeri, jazýshy, aýdarmashy, Memlekettik syılyqtyń laýreaty Jumaǵalı Ysmaǵulovtyń qurmetine ǵalymnyń ózi turǵan úıge eskertkish taqta ornatyldy, dep habarlaıdy QazAqparat tilshisi. 

Ádebıettanýshy ǵalym, fılologııa ǵylymdarynyń doktory, professor, «mirjaqyptanýshy» Jumaǵalı Ysmaǵulov 1928 jyly 17 sáýirde Qostanaı oblysy Sarykól aýdany, Sonaly aýylynda dúnıege kelgen.

Sol kezdegi S.Kırov atyndaǵy Qazaq Memlekettik ýnıversıtetiniń jýrnalıstıka fakýltetin támamdaǵan. Jumaǵlı Ysmaǵulovtyń shákirti, fılologııa ǵylymdarynyń kandıdaty Bazarbek Atyǵaı ǵalymnyń 1986 jylǵy erligi týraly aıtyp berdi.
«Jumaǵalı Ysmaǵulov qazirgi «QazAqparat», burynǵy «KazTAG-tyń» dırektory boldy uzaq jyldar. Ol kisiniń bir erligi bar: 1986 jyly alańdaǵy sýretterdi qoryqpaı jarııalaǵan edi. Sol úshin qyzmetinen de qýylǵan. Aýdarma salasyn janr retinde damytty. Kórkem aýdarma tarıhyndaǵy eń sheber aýdarmalardy jasady. Orys, shetel klassıkterin qazaqsha sóıletti. Ol - «abaıtaný» salasynda teńdessiz eńbek etken adam. Sonymen qatar, Alash ardagerleri aqtalǵan 1988 jyldardan keıin A.Baıtursynov pen M.Dýlatulynyń eńbekterin jınaqtap, bizdiń tarıhymyzdan alatyn ornyn naqtylaǵan ǵalymdardyń biri», - dedi Bazarbek Atyǵaı.


Jumaǵalı Ysmaǵulova 2005 jyly «Qurmet», «Halyq dostyǵy» ordenderimen marapattalǵan.
«Adam mereıi», «20-30 jyldardaǵy qazaq ádebıeti», «Marjan men mahabbat», «Adam mereıi» syndy ádebı týyndylardyń 40-tan astam ǵylymı eńbektiń avtory.
Eskertkish taqtanyń ashylýyna ǵalymnyń aǵaıyn-týystary men Almaty men Astananyń zııaly qaýym ókilderi jınaldy. Eskertkish taqta Almaty qalasy ákiminiń 19 shildedegi qaýlysy boıynsha júzege asqan.