Ǵalym Mutanov ISESCO syılyǵyn aldy

ASTANA. QazAqparat - Búgin Islam yntymaqtastyq uıymy sammıtiniń «Ǵylym men tehnologııalar salasyndaǵy yntymaqtastyqty damytý» sessııasy barysynda ISESCO bas dırektory Abdýlazız Osman ál-Týveıdjrı Ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanovqa ISESCO syılyǵyn tabys etti, dep habarlaıdy QazAqparat.

Abdýlazız Osman ál-Týveıdjrıdiń atap ótýinshe, qazaqstandyq ǵalym atalǵan mártebeli nagradaǵa ǵylym jolyndaǵy eńbeginiń halyqaralyq deńgeıde joǵary baǵalanyp, moıyndalǵany jáne matematıkalyq modeldeý, tehnıkalyq ári áleýmettik-ekonomıkalyq júıelerdi basqarý salasyndaǵy zor úlesi úshin marapattalǵan.

Aıta keteıik, ISESCO syılyǵy Islam yntymaqtastyq uıymyna múshe memleketterdiń ǵalymdaryna bıologııa, hımııa, geologııa, matematıka, fızıka jáne ǵylymı tehnologııa salalaryna qosqan aıryqsha ǵylymı-ınnovatsııalyq úlesteri úshin beriledi. Syılyq sertıfıkattan, altyn medaldan jáne aqshalaı syıaqydan turady.

ISESCO-ny 1979 jyly «Islam konferentsııasy» uıymy qurǵan bolatyn. Onyń quramyna 50-den astam memleket kiredi. Halyqaralyq uıymnyń qyzmeti ıslam álem elderiniń ǵylymyn, bilimi men mádenıetin damytýǵa jáne oǵan jan-jaqty qoldaý kórsetýge baǵyttalǵan.