Ǵalym koronavırýstyń «almatylyq shtamy» týraly aqparatty joqqa shyǵardy

ALMATY. QazAqparat - Qazaq ulttyq agrarlyq zertteý ýnıversıtetiniń janyndaǵy halyqaralyq vaktsınologııa ortalyǵynyń dırektory Qaısar Tabynov «koronavırýstyń almatylyq shtamy paıda boldy» degen aqparatty joqqa shyǵardy, dep habarlaıdy QazAqparat tilshisi.

«Bul aqparatty jýrnalıster durys túsinbeı qalǵan bolýy kerek. Biz amınqyshqyldaryn almastyratyn mýtatsııa týraly aıttyq. Tilshi ony «Almaty shtammy» dep qabyldady. Biz bul aqparatty joqqa shyǵaramyz. Biz «brıtandyq» jáne «ońtústik afrıkalyq» eki mýtatsııany dál anyqtadyq, basqa mýtatsııa týraly sóz bolǵan joq. Biz qazir vırýstardy bólip jatyrmyz jáne olardy zertteý úshin, vaktsınalardyń tıimdiligin baǵalaý úshin, sondaı-aq ázirlenip jatqan dárilerge baǵa berý úshin zertteýdi jalǵastyramyz. Bizdiń basty mindetimiz - osy», - dep túsindirdi ǵalym.

Buǵan deıin buqaralyq aqparat quraldarynyń birinde Qazaqstanda koronavırýstyń almatylyq shtamy paıda bolýy múmkin degen aqparat tarady.

Keıin Almatynyń bas sanıtar dárigeri Jandarbek Bekshın qalada «koronavırýstyń almatylyq shtamy paıda boldy» degen aqparatqa qatysty pikir bildirdi.