Ǵalym qazaqsha ymdaý tilin tanýdyń ıntellektýaldy júıesin oılap tapty

ASTANA. QazAqparat – Ǵalym Nurzada Amangeldi qazaqsha ymdaý tilin tanýdyń ıntellektýaldy júıesin jasap shyǵardy. Biregeı ázirleme erekshe qajettilikteri bar adamdarǵa arnalǵan, dep habarlaıdy QazAqparat Ǵylym jáne joǵary bilim mınıstrligine silteme jasap.

L. Gýmılev atyndaǵy Eýrazııa ulttyq ýnıversıteti aqparattyq tehnologııalar fakýltetiniń oqytýshysy Nurzada Amangeldi 5 jyldan beri zertteý júrgizgen. Ǵylymı joba jasandy ıntellektke negizdelgen jáne sóıleý men estý qabileti buzylǵan adamdarǵa baǵyttalǵan. Júıe qazaqsha ymdaý tiline beıimdelgen, bul – onyń basty biregeıligi.

Júıeni ázirleý barysynda Nurzada Amangeldi bir ymnyń birneshe nusqasyn daıyndaǵan. Ǵalym olardy kórsetilý kúrdeliligi boıynsha toptarǵa bólip, árqaısysy úshin jasandy neırondy jeli modelin ázirlegen.

Júıe bolashaqta ym álipbıin, ym tilin biletin sýrdoaýdarmashylardy daıyndaı alady. Mundaı mamandar túrli memlekettik uıymdarǵa qajetti. Búgingi tańda biz mobıldi qosymsha jasaýǵa kiristik. Onyń kómegimen ym tilimen ózara sóılesýge bolady. Sóıleýdi mátinge, mátindi ymǵa jáne kerisinshe túrlendiretin júıe qurylady. Osy jobamnyń arqasynda erekshe qajettilikteri bar adamdardyń mektepte yńǵaıly oqýy, medıtsınalyq jáne memlekettik mekemelerde qyzmet alýy jáne erkin sóılesýi men úshin óte mańyzdy. Osy taqyrypty zerttep, óz úlesimdi qosý – azamattyq boryshym

, - deıdi ǵalym.

Zertteý nátıjesi boıynsha Nurzada Amangeldi avtorlyq kýálikke ıe boldy jáne álemdik reıtıngi joǵary jýrnaldarda 3 maqala jarııalady. Ótken jyly ýnıversıtettiń «JANA ASU» ishki granttyn alǵan.

«Qazaqstandyq sańyraýlar qoǵamy» qoǵamdyq birlestiginiń vıtse-prezıdentimen kezdesý barysynda olardyń balalardy oqytýǵa qatysty máselelerin bildim. Qazaqsha jáne basqa tilder boıynsha ymdaý tilin úıretýge arnalǵan zııatkerlik trenajer – Qazaqstannyń sańyraý qoǵamyndaǵy estý qabileti buzylǵan balalarǵa zor kómek kórsete alatyn qajettilik. Mundaı oqytý júıesi balalarǵa ymdaý tilin úırenýge jáne qorshaǵan ortada qarym-qatynas jasaýdy úırenýge múmkindik beretin tıimdi qarym-qatynas quraldarymen qamtamasyz ete alady. AQSh pen Qazaqstannyń ǵalymdar toby bizdiń eldegi estý jáne sóıleý qabileti buzylǵan adamdar úshin bilim berý jáne oǵan qoljetimdilik salasynda birqatar zertteý bastady. Bizdiń birlesken jumysymyz elimizde ǵana emes, Ortalyq Azııada paıdaly bolatyn úlken ǵylymı jobaǵa aınalady dep senemiz

, - deıdi Nurzada Amangeldi.

Ol ǵylymı ázirlemesin kommertsııalandyrýdy qolǵa almaq. Ǵylym qorynyń baıqaýyna qatysý úshin ótinim joldaǵan.