Ǵalymdar reıtıngi nashar zaýyttardy jol salýǵa jolatpaýdy talap etti

<p>ASTANA. KAZINFORM &mdash; QR Kólik mınıstrliginiń tapsyrmasymen &laquo;QazjolǴZI&raquo; AQ-nyń mamandary asfaltbeton zaýyttaryna tehnıkalyq aýdıt júrgizdi. 400 asfaltbeton zaýyty (ABZ) normatıvtik talaptar boıynsha tekserildi.</p>

Aýdıt nátıjesinde zaýyttardyń kópshiliginde materıaldardy baqylaý rettelmegeni, daıyn ónimniń esebi durys júrgizilmegeni, bastapqy materıaldarda zerthanalyq baqylaýdyń joqtyǵy jáne basqa da kemshilikter anyqtaldy.

«Qazir ár asfaltbeton zaýyty arnaıy RCMbase.kz jol-qurylys materıaldary men jańa tehnologııalardyń biryńǵaı tsıfrlyq portalyna engizilgen. Tekseris nátıjesinde ár zaýytqa reıtıng berildi: eń az – 3 juldyz (bazalyq talaptarǵa sáıkestik), eń kóbi – 5 juldyz (qazirgi zamanǵy zaýyt, óziniń synaq zerthanasynyń bolýy)», - dedi «QazjolǴZI» AQ-nyń jańa tehnologııalar basqarmasynyń basshysy Qaırat Muhambetqalıev.

Osylaısha, jol qurylysyna tapsyrys berýshiler RCMbase.kz portalynan elimizdegi asfaltbeton zaýyttarynyń dárejesin kóre alady. Soǵan sáıkes reıtıngisi tómen nemese asfalt shyǵarý óndirisi uıymdastyrylǵan, zerthanalyq baqylaýy bar, jalpy dárejesi ári sapasy joǵary zaýytty tańdaı alady. Baǵalaýdyń bolmaýy – tapsyrys berýshige, tehnıkalyq qadaǵalaý ınjenerine, tekserýshi organdarǵa zaýyttyń sapasyna kúdikpen qaraýǵa túrtki bolady.

Asfaltbeton zaýyttaryn tekserý turaqty negizde júrgiziledi. Bul óz kezeginde shyǵarylatyn ónimniń, sondaı-aq qazaqstandyq joldardyń sapasyn arttyrýy tıis.

Bul tásil jol-qurylys materıaldary óndiriletin karerlerge de qatysty qoldanyldy. Karerler asfalt daıyndaýǵa jáne joldardyń negizgi qabattarynda qoldanylatyn materıalyna qaraı ekige bólinedi. Ár materıaldyń standarttarǵa sáıkestigine naqty talaptar qoıylady.

Arnaıy tekseris qorytyndysyna sáıkes, 2024 jylǵy 1 maýsymdaǵy jaǵdaı boıynsha RCMbase.kz bazasynyń kartasyna elimizdiń 12 aımaǵyndaǵy 189 karer engizildi, onda jol-qurylysyna qajet materıaldyń 300-den astam túri óndiriledi. Jyl sońyna deıin portalǵa Qazaqstannyń barlyq qoldanystaǵy karerlerin engizý kózdelgen.

Avtojoldardyń sapasy – qoldanylatyn jol qurylys materıaldarynyń sapasyna, qospalardy durys irikteýge (bıtým, qıyrshyq tas, mıneraldy untaq, polımerli qospalar jáne t.b.), sondaı-aq óndirý tehnologııalarynyń saqtalýyna tikeleı baılanysty.