Ǵalymdar: Memlekettik qyzmetti qalyptastyrý turaqty, erikti negizde jalǵasýy kerek

<p>Qazaqstan Respýblıkasy Prezıdentiniń janyndaǵy Memlekettik basqarý akademııasynda &laquo;Memlekettik qyzmet: qaǵıdattar men qundylyqtar&raquo; taqyrybynda halyqaralyq ǵylymı-tájirıbelik konferentsııa ótti, dep habarlaıdy <a href="https://kaz.inform.kz/" target="_blank" rel="noopener">Kazinform</a> QR Memlekettik basqarý akademııasynyń <a href="https://academyconference.apa.kz/kk/main-kz/" target="_blank" rel="noopener">baspasóz</a> qyzmetine silteme jasap.&nbsp;</p>

Akademııalyq konferentsııa kórnekti ǵalymdardyń, magıstranttar men doktoranttardyń memlekettik qyzmet jáne memlekettik basqarý týraly ozyq ıdeıalaryn talqylaý jáne ilgeriletý, sondaı-aq jas zertteýshilerdiń óz qabiletin iske asyrýy jáne problemalardy sheshýge qatysýy úshin saraptamalyq alańdy qamtamasyz etý maqsatynda uıymdastyryldy.

Konferentsııa JTN BR18574203 «Memlekettik qyzmetti damytý protsesterin ǵylymı-ádisnamalyq negizdeý jáne Jańa Qazaqstandy qurý aıasynda memlekettik organdardyń qyzmetin transformatsııalaý» baǵdarlamasyn iske asyrý sheńberinde ótkizildi.

Halyqaralyq shara barysynda vıtse-rektor Margarıta Qadyrova memlekettik qyzmetshilerdi daıarlaý jáne qaıta daıarlaýdyń qazirgi baǵdarlamalaryn taldaýdyń nátıjeleri týraly baıandady.

Onyń aıtýynsha, memlekettik organdardyń kadr qyzmetteri basshylaryna júrgizilgen saýalnamanyń nátıjesinde basshylar men oryndaýshylar úshin «Qyzmetterdi tutynýshyǵa baǵdarlaý jáne ony aqparattandyrý» taqyrybynda quzyrettilikti arttyrý boıynsha biliktilik arttyrý semınarlary baǵdarlamalarynyń jobalary ázirlendi. Bul jobalar memlekettik qyzmetshilerdi daıarlaý men qaıta daıarlaý jáne biliktiligin arttyrýdyń bilim berý baǵdarlamalaryna engizý úshin usynylady.

«Memlekettik qyzmetti qalyptastyrý turaqty, erikti negizde jalǵasýy kerek. Óz kezeginde, qoǵamdyq baqylaýdyń áleýmettik negizin saqtaýdyń mańyzdy sharty azamattyq sanany anyqtaıtyn normalar men qundylyqtardy únemi jetildirý bolyp tabylady. Qazirgi ýaqytta tek áleýmettik qatysý ǵana emes, sonymen qatar halyq toptary men qoǵamdyq birlestikterdiń áleýmettik múddelerdi bildirý jáne bekitý múmkindigi de erekshe ózekti másele bolyp qala beredi. Nátıjeler saraptamasy memlekettik qyzmetshilerdiń 40%-dan astamy memlekettik qyzmetshilerge eń qajetti kelesi quzyretterdi anyqtaǵanyn kórsetti: etıkalyq normalar men qaǵıdattardy saqtaý, tıimdilik, qyzmetti basqarý, yntymaqtastyq, táýelsizdik jáne sheshim qabyldaý daǵdylary, sondaı-aq ujymdy basqarý», – dedi joba sarapshysy, M.Áýezov atyndaǵy Ońtústik Qazaqstan memlekettik ýnıversıtetiniń professory Esirkepova Altyn.

Basqarý ınstıtýtynyń professory Ane Tynyshpaevanyń oıynsha, memlekettik qyzmetshiler áleýmettik jáne kásibı turǵydan alǵanda áleýmettik top belgilerine ıe, mysaly: ortaq maqsatpen biriktirilgen, qoǵamǵa qyzmet etý, áleýmettik mańyzdy isterdi júzege asyrý, basqa áleýmettik toptardyń júıeli talaptary, qyzmettik mindetterin joǵary deńgeıde oryndaýǵa qatysty qoǵamnyń kútilimi jáne óz qyzmetinde moraldyq-etıkalyq talaptardy saqtaý.

Óz kezeginde Akademııanyń Qoldanbaly zertteýler ınstıtýtynyń dırektory Aıgúl Kósherbaeva memlekettik basqarýdyń zamanaýı modelin qalyptastyrýdyń jáne memlekettik qyzmetti reformalaýdyń jalpyǵa birdeı umtylys sıpatyna ıe bes negizgi tásili bar ekenin atap ótti. Bul tásilder halyqaralyq qoǵamdastyq moıyndaǵan jáne osy salalardaǵy halyqaralyq uıymdardyń saıasatynyń ádisnamalyq negizi retinde paıdalanylady. Olarǵa mynalar jatady:

1. «Ashyq úkimettiń» transparenttilik, úkimettiń esep berýi jáne basqarýǵa múddeli taraptardyń qatysýy sııaqty negizgi prıntsıpterin engizý.

2. Memlekettik organdar qyzmetiniń tıimdiligin bıýrokratııasyzdandyrý jáne aqparattandyrý arqyly, sondaı-aq jeke sektorda synalǵan basqarý prıntsıpteri men ádisterdi qoldaný arqyly arttyrý, mysaly, nátıjege baǵdarlaný, tutynýshylarǵa baǵdarlaný, ıkemdilik jáne t.b.

3. Kóptegen memlekettik (ámbebap) qyzmetterdi bólý jáne básekeles ortaǵa berý jáne ókilettikter men jaýapkershilikterdiń ońtaıly úılesimi negizinde ortalyqtandyrylmaǵan basqarý ortasyn qurý arqyly memlekettik fýnktsııalardy aıtarlyqtaı qysqartý.

4. Baǵdarlamalyq-nysanaly bıýdjetteý (baǵdarlama qurylymyna sáıkes bıýdjetti qaıta jikteý) jáne nátıjege negizdelgen bıýdjetteý (qarajattardy ólshenetin nátıjelermen baılanystyrý úshin nátıjeler týraly aqparatty paıdalaný).

5. Adam resýrstaryn basqarýdyń jańa tehnologııalaryn paıdalaný, adamǵa baǵyttalǵan memlekettik apparatty qalyptastyrý jáne kelisim-sharttar arqyly jumysqa jaldaý.

Professor Djýnýsbekova Gúlsara qoldanystaǵy strategııalyq qujattardy iske asyrý tıimdiligin arttyrýǵa ǵana emes, sonymen qatar bar fýnktsııalarǵa negizdelgen jańa qujattardy ázirleýge jáne barlyq deńgeıler boıynsha kezeń-kezeńimen kaskadty túrde engizýge múmkindik beretin fýnktsıonaldyq taldaýdyń mańyzdylyǵyn atap ótti.

Konferentsııa Qazaqstan Respýblıkasynyń Prezıdenti Qasym-Jomart Toqaevtyń Qazaqstan Respýblıkasynyń Úkimetine ǵylymı-saraptamalyq jumystardyń sapasyn arttyrý, ǵylymı zertteýshilerdiń usynystaryn, sondaı-aq memlekettik organdardyń ǵylymı-zertteý jumystaryn paıdalaný týraly tapsyrmasy aıasynda ótti.