Ǵalymdar -10 gradýsta asfalt tóseýge múmkindik beretin qospa oılap tapty

<p>ASTANA. KAZINFORM — Elimizdiń jol qurylysy salasynda jańa tehnologııa synaqtan ótýde, dep habarlaıdy Kólik mınıstrliginiń baspasóz qyzmeti.</p>

Qazaqstandyq jol ǵylymı-zertteý ınstıtýtynyń mamandary (QazjolǴZI) respýblıkalyq mańyzy bar avtojoldarda aýa temperatýrasy -10 gradýsta asfalt tóseýge múmkindik beretin arnaıy tehnologııany synaqtan ótkizýde. Arnaıy qospa kún raıy sýyǵan kezde de jol qurylysy jumystaryn jalǵastyrýǵa septigin tıgizbek. Bul ásirese qurylys maýsymy 3-4 aıǵa ǵana sozylatyn elimizdiń soltústik óńirleri úshin mańyzdy.

Foto: Kólik mınıstrliginiń baspasóz qyzmeti

— Jol qurylysy standarttary boıynsha, asfalt-beton qospasynyń temperatýrasy jol salý kezinde keminde 125-130 gradýs bolýy kerek, al asfalt tek +5 gradýstan joǵary aýa temperatýrasynda ǵana tóselýi tıis. Alaıda ǵalymdar qospany 90 gradýs temperatýrada daıyndap, ony -10 gradýsqa deıingi temperatýrada tóseýge múmkindik beretin keshendi qospany oılap tapty, — delingen mınıstrlik habarlamasynda.

Qospany qoldaný barysynda jol jamylǵysynyń barlyq fızıka-mehanıkalyq qasıetteri saqtalady, asfaltty daıyndaý jáne tyǵyzdaý kezeńderinde energııa shyǵyny edáýir azaıyp, qorshaǵan ortaǵa tıetin teris áser kórsetkishi tómendeıdi. Instıtýt mamandary keshendi qospa bıtým men mıneraldy materıaldar arasyndaǵy baılanysty kúsheıtetinine de nazar aýdarýda.

Arnaıy qospanynyń zerthanalyq synaqtary aldymen Almatydaǵy «QazjolǴZI»-dyń laboratorııasynda júrgizildi. Zerthanalyq synaq nátıjesi jańa qospa qatal klımattyq jaǵdaıda joldyń merziminen buryn tozýyn boldyrmaıtynyn kórsetti.

Tehnologııa respýblıkalyq mańyzy bar Kúrti-Burylbaıtal jolynda synaqtan ótýde. Eger synaq sátti ótse, bul tehnologııa jol qurylysy maýsymyn uzartyp, energııa resýrstaryna ketetin shyǵyndy qysqartyp, asfalt-betondy qyzdyrýǵa baılanysty kómirqyshqyl gazynyń shyǵaryndylaryn azaıtýǵa múmkindik bermek.

Buǵan deıin Jetisýda 30 jyldan beri jóndelmegen jolǵa asfalt tóselgeni habarlandy.