Ǵalamtorda jemqorlyq jaıynda jazatyn ortaq alań qajet - qoǵamdyq ombýdsmen
«Meniń qazirgi qyzmetim memlekettik laýazym emes. Halyq bizge ǵalamtorda daýys berý arqyly tańdady. Bul - xalyqtyń senimi. Sondyqtan biz osy senimdi aqtaýymyz qajet. Tórt qabyrǵaǵa qamalyp qalmaı, xalyqpen tikeleı jumys jasaý qajet. Qazirgi kezde ol jaǵynan múmkindik kóp. Máselen, búginde ǵalamtor arqyly kóptegen aqparatqa qol jetkizýge bolady. Sebebi bári ashyq jarııalanady. Menińshe, ǵalamtorda sybaılas jemqorlyq faktileri jaıynda xabarlaýǵa bolatyn ortaq bir alań bolýy qajet. Óıtkeni adamdar áleýmettik jelide, ıa bolmasa, basqa bir portaldarda naqty faktiler týraly jazyp jatady. Al onyń barlyǵyn bir ýaqytta baqylaý qıyn. Sondyqtan ortaq bir portaldyń bolǵany durys», - deıdi Ábdiraxmanov.
Onyń aıtýynsha, jemqorlyqqa qarsy qoǵamdyq ombýdsmender jyldyń aıaǵyna deıin barlyq aımaqtardy aralap, xalyqpen kezdesip shyqqandy josparlap otyr. Negizgi maqsat - keri baılanysty ornatý. «Jemqorlyqty qaǵazben baqylaýdy qoıý qajet. Aımaqtarǵa shyǵyp, xalyqpen kezdesken jón. Sol jerde jemqorlyqqa tap bolǵan adamdardyń ózderinen barlyq aqparatty alyp, sony aıaǵyna deıin jetkizgen durys», - dep atap kórsetti qoǵamdyq ombýdsmen.
Aıta keteıik, qoǵamdyq daýys berý arqyly tórt ombýdsmen saılanǵan bolatyn. Olar - balalar quqyqtaryn qorǵaý jónindegi jemqorlyqqa qarsy qoǵamdyq ombýdsmen Janna Axmetova, bıznes pen qarjy-ekonomıkalyq salany qorǵaý jónindegi qoǵamdyq ýákil Denıs Krıvosheev, sybaılas jemqorlyq salasyndaǵy zańnamany saqtaý jónindegi qoǵamdyq ombýdsmen Syrym Ábdiraxmanov jáne quqyq qorǵaý men bıýdjet salasy qyzmetkerleriniń quqyqtaryn qorǵaý jónindegi ýákil Dına Elgezek.