Ǵalamtorda esirtkini nasıhattaý belsendi júrip jatyr - ІІM

ASTANA. QazAqparat – Jal saıyn elimizde esirtkiniń shamamen 50 iri plantatsııasy joıylady. Bul týraly Іshki ister mınıstrligi Esirtki qylmysyna qarsy is-qımyl departamentiniń basqarma basshysy Baqytjan Ámirhanov aıtty, dep habarlaıdy QazAqparat tilshisi.

«Esirtki saýdasy ınternet jáne elektrondyq tólem júıeleri arqyly júzege asady. Zamanaýı tehnologııalar esirtkini belsendi nasıhattaýǵa yqpal etedi», - dedi B. Ámirhanov Ortalyq kommýnıkatsııalar qyzmetinde.

Osy oraıda ol jyl basynan beri esirtki saýdasy men nasıhatyna qatysty 2 myńǵa jýyq saıt buǵattalǵanyn aıtty. Sonyń arasynda «Telegram» messendjerindegi zańsyz áreketterge shekteý qoıylǵan. Esirtki saıttarynyń negizgi bóligi «Kıbernadzor» aqparattyq júıesi arqyly avtomatty túrde buǵattalady.

«Elimizde tárkilenip jatqan esirtkiniń 90 paıyzy osy kannabıs shıkizatynan daıyndalady. Bul turǵyda tek Shý alqaby ǵana emes, sondaı-aq elimizdiń basqa da qurǵaq ári ystyq óńirlerinde osy esirtki túri ósedi. Sondyqtan da Іshki ister mınıstrligi jyl saıyn «Qarasora» jedel-profılaktıkalyq is-sharasyn ótkizip otyrady», - dedi basqarma basshysy.

Vedomstvo málimetine qaraǵanda, atalǵan operatsııaǵa 1,5 myńǵa jýyq qyzmetker qatysady. Onyń aıasynda tikushaq tehnıkasy men arnaıy kólikter qoldanylady. Jyl saıyn 10-15 tonna aralyǵynda esirtki tárkilenedi. 200 -den astamy esirtki ósiretin egistikter men 50-deı iri plantatsııa joıylady.

Budan buryn habarlanǵandaı, jyl basynan beri 2,5 myńǵa jýyq esirtki qylmysy anyqtaldy.