Ǵalamtorda Alashorda jylnamasyn jarııalaıtyn paraqsha ashyldy

ASTANA. QazAqparat - Feısbýkte Alashorda kóshbasshylarynyń 100 jyl burynǵy ustanymdary men sol tustaǵy tarıhı hronıkasy jarııalanyp turatyn «Alash partııasy» paraqshasy ashyldy, dep habarlaıdy «QazAqparat» HAA tilshisi.

National Digital History ınternet-portalynyń shyǵarýshy redaktory Zańǵar Kárimhannyń aıtýynsha, asa mańyzdy tarıhı oqıǵa - Ekinshi jalpyqazaq sezindegi Alash avtonomııasynyń jarııalanýynyń 100 jyldyǵy (5-13 jeltoqsanda) jaqyndap keledi.

«Eger de osydan 100 jyl buryn Feısbýk áleýmettik jelisi bolǵanda ult zııalylary ne ister edi? NDH ınternet-portalynyń komandasy osy ıdeıany iske asyrýdy sheship, jańa joba - áleýmettik jelide  «Alash partııasy» paraqshasyn ashty. Sol zamandaǵy basylym betterinde jaryq kórgen gazettik jarııalanymdar, jedelhattar, sóılegen sózder, muraǵat qujattary negizinde «Alash» partııasynyń kóshbasshylary, ult zııalylary qandaı da bir saıası, áleýmettik, ekonomıkalyq máseleler boıynsha óz ustanymdaryn osy topta jarııalaıtyn bolady», - deıdi Zańǵar Kárimhan.

Onyń aıtýynsha, barlyq oqıǵalar tarıhı tizbekte qalpyna keltiriletin bolady. «Alash partııasy» paraqshasynda osydan 100 jyl burynǵy oqıǵalar hronıkasy bir júıege túsirilip, árbir paıdalanýshy sol zamannyń atmosferasyn sezine alady.

«Alash partııasy» toby óz halqynyń tarıhyna nemquraıly qaraı almaıtyn, qazaq memlekettiliginiń qalyptasý evolıýtsııasyna, onyń bir kezeńi bolǵan Alash avtonomııasy tarıhyna qyzyǵýshylyq tanytatyn ár azamat úshin árdaıym ashyq. Áleýmettik jeli qoldanýshylaryn osy jobany qoldaýǵa jáne jelidegi topqa qosylýǵa shaqyramyz», - deıdi Zańǵar Kárimhan.