Ǵalamat sózin ásireleý úshin qoldanyp turǵan joqpyn - Qul-Muhammed el ekonomıkasy jaıynda
«Parlament Májilisindegi nurotandyq depýtattardyń zań shyǵarýshylyq bastamasy artyp, partııaaralyq tártip kúsheıtildi. Bul depýtattarymyzdyń aýyzbirshiligi men yntymaqtastyǵyn odan ári nyǵaıta tústi. «100 naqty qadam» Ult jospary jáne el ekonomıkasy damýyna ǵalamat serpin bergen «Nurly jol», «Nurly jer» baǵdarlamalarynyń iske asyrylýy boıynsha keńinen túsindirý jumysyn júrgizý úshin baqylaýdy kúsheıtý partııalyq ortalyq apparat pen jergilikti uıymdardyń basty nazarynda bolyp keledi. Men ǵalamat sózin ásireleý úshin qoldanyp turǵan joqpyn. Talqylaýyna ózim Senat depýtaty retinde qatysqan 2000 jylǵy elimizdiń memlekettik bıýdjeti 591 mıllıard teńge bolsa, tek bir ǵana «Nurly jol baǵdarlamasy boıynsha 2015 jyly 770 mıllıard, 2016 jyly 739 mıllıard, al bıyl 647 mıllıard teńge. Basqasha aıtqanda, úsh jyl ishinde 2000 jyldyń tórt memlekettik bıýdjetine para-par qarajat tek osy baǵdarlama boıynsha ǵana halyqqa bólindi. «Nur Otan» partııasy Siz el ıgiligine baǵyttaǵan bul qarjynyń halyqqa jetýin árdaıym jiti qadaǵalaýda ustap keledi»,- dep atap ótti M. Qul-Muhammed «Nur Otan» partııasy Saıası keńesiniń keńeıtilgen otyrysynda.
Sondaı-aq ol bıylǵy jyly osy salaǵa jaýapty 6 Úkimet múshesiniń esebine arnalǵan partııalyq tyńdaýlar ótkizilgenin, onda elimizdiń árbir óńirindegi nurotandyq depýtattar mınıstrler men ulttyq kompanııalar basshylaryna óz suraǵyn joldaý múmkindigine ıe bolǵanyn, tyńdaýlardyń nátıjesinde Úkimetke 106 usynys joldanyp, qazir solardyń basym kópshiligi oryndalǵanyn atap ótti.
Aıta keteıik, Astanada Elbasy Nursultan Nazarbaevtyń tóraǵalyǵymen «Nur Otan» partııasy Saıası keńesiniń keńeıtilgen otyrysy ótip jatyr.
Otyrystyń kún tártibinde partııanyń 2017 jyldyń 10 aıynda elimizdiń saıası, ekonomıkalyq jáne rýhanı jańǵyrýy aıasynda atqarǵan jumysy, sonymen qatar «Nur Otan» partııasy Saıası keńesi Bıýrosynyń quramyna ózgertýler engizý baǵyty qaralýda.