Gaıtıdegi qylmyskerlerdiń jartysy — balalar — UNICEF

<p>ASTANA. KAZINFORM — Gaıtıde bir jylda qarýly toptar qataryna tartylǵan balalardyń sany 70 paıyzǵa ósti. Bul týraly <a href="https://www.unicef.org/press-releases/number-children-haiti-recruited-armed-groups-soars-70-cent-one-year-unicef" target="_blank" rel="noopener">UNICEF baıandamasynda</a> aıtylǵan. </p>

Gaıtı ondaǵan jyl boıy saıası turaqsyzdyqty bastan ótkerdi, biraq sońǵy aılarda zorlyq-zombylyq kúsheıe tústi. Bandylar qazir el astanasy Port-o-Prenstiń 80 paıyzyn baqylap otyr.

— 2023 jyldyń ekinshi toqsany men 2024 jyldyń ekinshi toqsany arasyndaǵy buryn-sońdy bolmaǵan bul kórsetkish zorlyq-zombylyq kúsheıgen Karıb teńizi aralyndaǵy balalardy qorǵaý daǵdarysynyń odan ári tereńdeı túskenin kórsetedi, — delingen UNICEF málimdemesinde.

UNICEF balalardy mundaı jumysqa tartýdyń ósýin — zorlyq-zombylyqtyń artýy, keń taralǵan kedeılik, bilimniń jetispeýshiligi jáne mańyzdy ınfraqurylymnyń tolyǵymen joıylýymen baılanystyryp otyr. Sonymen qatar, uıym qarýly top músheleriniń jartysy qazir balalar ekenin atap ótti.

Bul málimdemege UNICEF-tiń atqarýshy dırektory Ketrın Rassel de pikir qosty.

— Gaıtıdegi balalar qatygez tsıklge túsip qalǵan — olar ózderiniń qıyn jaǵdaıyna yqpal etetin qarýly toptarǵa qosylýda jáne olardyń sany artyp keledi, — dedi ol.

Aıta keteıik, sáýir aıynyń basynda úsh apta ishinde 53 myńnan astam adam qatygez toptyń, ıaǵnı, qaraqshylardyń zorlyq-zombylyǵynan qutylý úshin Gaıtı astanasyn tastap ketken edi.