Gaıtıde jer silkinisinen qaza tapqandar sany 1 419-ǵa jetti
Bul týraly dúısenbi kúni memlekettik telearna efırinde respýblıkanyń azamattyq qorǵaý basqarmasy málim etti, dep habarlaıdy QazAqparat TASS agenttigine.
«Qazirgi kezde azamattyq qorǵaý basqarmasy 1 419 qaza tapqan adamdy tirkedi: olardyń 1 133-i Ońtústik departamentinde, 162-si Grand-Ans, 122-si Nıpp jáne ekeýi Soltústik-batys departamentte anyqtalǵan. Sonymen qatar biz 6,9 myńnan asa adamnyń túrli jaraqattar alǵanynan habardarmyz», - dep málimdedi vedomstvo ókili.
Bılik derekteri boıynsha, óńirdegi 37 myńǵa jýyq ǵımarat tolyǵymen nemese jartylaı qıraǵan, qazirgi kezde qutqarýshylar úıindilerdiń astynan adamdardy izdestirýde.
Senbi kúni tańerteń Gaıtıde 7,2 baldyq jer silkinisi boldy. Zilzala oshaǵy shamamen 125 myń halqy bar Le-Ke kommýnasynan 40 shaqyrym jerde ornalasqan, tereńdigi – 10 km. Qatty zardap shekken departamentter qatarynda Ońtústik, Grand-Ans jáne Nıpp departamentteri bar. Úkimet bir aıǵa tótenshe jaǵdaı ornatty.