Gaıtıde jer silkinisinen qaza bolǵandar sany 2 189 adamǵa jetti
Bul týraly sársenbi kúni respýblıkanyń azamattyq qorǵanys basqarmasynan málimdedi, dep habarlaıdy QazAqparat TASS aqparat agenttigine silteme jasap.
Vedomstvo taratqan málimetke sáıkes, Ońtústik departamentinde 1 832 adam, Grand-Ans departamentinde 218 adam, Nıpp departamentinde 137 adam jáne Soltústik-Batys departamentinde eki adam qaza boldy. Sondaı-aq jaraqat alǵan 12 268 adam tirkeldi. Aımaqta 100 myńnan astam ǵımarat tolyq nemese jarym-jartylaı qıraǵan. Qazirgi kezde qutqarýshylar úıindiler astynan adamdardy izdeýdi jalǵastyryp jatyr.
Eske sala keteıik, 14 tamyz tańda Gaıtıde magnıtýdasy 7,2 jer silkinisi boldy. Zilzala epıtsentri 125 myńǵa jýyq turǵyny bar Le-Ke kommýnasynan 40 shaqyrym jerde ornalasqan, tereńdigi - 10 shaqyrym. Jer silkinisi saldarynan Ońtústik, Grand-Ans jáne Nıpp departamentteri qatty zardap shekti.
El úkimeti bir aıǵa tótenshe jaǵdaı rejımin engizdi.
Gaıtıde qýatty jer silkinisinen keıin «Greıs» tropıkalyq daýyly bastaldy. Ol jer silkinisinen zardap shekkenderge kómek kórsetý jáne tiri qalǵandardy izdeý jumystaryn qıyndatty.
Gaıtı 2010 jyly 200 myńnan astam adamnyń ómirin qıyp áketip, bir jarym mıllıon adamdy panasyz qaldyrǵan jer silkinisinen keıin áli esin jıǵan joq. Tipti, eldegi prezıdent saraıy da áli qalpyna keltirilmegen.