Ǵadilbek Shalahmetov jas metallýrg Nazarbaevtan qalaı suhbat alǵanyn aıtyp berdi
«Men 1965 jyly «metallýrg» mamandyǵy boıynsha polıtehnıkalyq ınstıtýtty bitirdim, biraq jýrnalıst bolyp jumys istedim. Sodan basshylyq jumysshy mamandyǵyn dáriptep, metallýrgtardyń ómiri týraly habar daıyndaýdy tapsyrdy. Temirtaýda jumys istep júrgen jas metallrýg Nursultan Nazarbaevtan suhbat alýdy usyndy. Sóıtip, Temirtaýǵa baryp, qazaq teledıdarynda kólemdi suhbattyq baǵdarlama daıyndadyq. Ekeýmiz de metallýrg bolǵandyqtan, biraz áńgimelestik. Suhbat barysynda domna peshinen shyqqan ushqyndarǵa shydamaı, teris aınalatyn edim. Al ol mamandyǵyna ábden berilgen, miz baqpaıtyn. Bul 1967 jyl edi. Bul kezde Nursultan qarapaıym jumysshy bolatyn jáne onyń telearnaǵa bergen alǵash suhbaty osy», - dedi Ǵ. Shalahmetov elordadaǵy Eýrazııa ulttyq ýnıversıtetinde ótken konferentsııada tilshilerge bergen suhbatynda.
Sonymen birge, ol Eýrazııa ulttyq ýnıversıtetine ǵalym L. N. Gýmılevtiń esimin berý tarıhyn aıtyp berdi.
«Lev Gýmılev meniń jaqyn dosym edi. Ool maǵan óziniń «Etnogenez ı bıosfera zemlı» degen kitabyn jiberdi. Bir issaparda ushaqta sony oqyp otyrdym. Janymda otyrǵan Nursultan kitapqa qyzyǵýshylyq tanytty. Ǵylymı kitap qoı, sizge qajeti joq dedim. Men de kóreıin dep, kitapty oqydy. Bul shamamen 1977 jyldar edi. Shamamen otyz jyl ótken soń, 2004 jyly astanadaǵy ýnıversıtetke L. Gýmılevtiń esimin berdi. Sonda Gýmılevti jadynda saqtap, umytpaı júrgenine tańǵaldym», - dedi Ǵ.Shalahmetov.
Onyń aıtýynsha, Elbasy bıikke kóterilse de, adamı qasıeti men tulǵalyq kelbeti ózgermegen.
«Nursultan Ábishulynyń erekshe qasıetteriniń biri – bolashaqty oılaıdy jáne alystan boljaı alady. Keńes odaǵy ydyraǵan soń, Elbasy men B.Eltsın maǵan eki elge ortaq telearna qurýdy tapsyrdy. Nátıjesinde, 1992 jyly «Mır» telearnasy quryldy. Telearna qos eldiń dostyǵynyń belgisi retinde áli jumys istep keledi. Sol arnany der kezinde qurdyq dep oılaımyn. Álemdik mańyzy bar odaq qırap, onyń quramynan shyǵyp, bólek memleket bolý ońaı sharýa emes. Toqsanynshy jyldardaǵy qıyndyq pen búgingi beıbit zamandy kórgen adam onyń qanshalyqty mańyzdy ekenin biledi. Sondyqtan, qıyn-qystaý zamanda eldiń birligin saqtaı bilgen Nursultan Nazarbaevtyń eńbegin baǵalaý qajet», - dedi Ǵadilbek Shalahmetov.