Ǵabıdolla Ábdirahymov: Aımaqtarda jumys isteýge nıetti jastar Shymkentke kelsin

ASTANA. QazAqparat - Shymkent qalasynyń ákimi Ǵabıdolla Ábdirahymov «Bolashaq» halyqaralyq stıpendııasymen shetelde oqý bitirip kelgen jastardy Shymkentke jumysqa shaqyrdy, dep habarlaıdy QazAqparat tilshisi.

«Barshańyzdy «Bolashaq» baǵdarlamasynyń 25 jyldyǵymen shyn júrekten quttyqtaımyn. Sheteldegi oqýdan qaıtyp kelgennen keıin, elde bes jyl jumys isteý mindetteletin shart bolǵan edi. Qazir óńirlerge baramyn degen qyzdar men jigitterge bul merzim 3 jylǵa qysqarǵanyn bilesizder. Árıne, memleket úshin jumys isteımin degen azamattar 5 jyl, 3 jyl demeıtin shyǵar. Eger memleketke eńbek etemin dep sheshseń, ýaqytty sanamaýyń kerek. Óz ómirińdi memleket, halyq úshin arnasań, ondaı adamdarǵa meniń oıymsha, eshqandaı shekteýdiń keregi joq», - dedi Shymkent qalasynyń ákimi Astanada ótken forýmda.      

Ǵabıdolla Ábdirahymov Elbasynyń «qandaı kásippen aınalysamyn deseńizder de, birinshi, memlekettik qyzmetten ótińder» dep aıtqan sózin eske aldy.

«Eger adam óziniń ómirlik jolyn memlekettik qyzmetten bastasa, keıin bızneske aýysqan kezde oǵan edáýir ońaı bolady. Sebebi, meniń oıymsha, memlekettik qyzmet - armııa sııaqty. Tártip, jaýapkershilik... Álbette, «Bolashaq» stıpendıattary el ishinde eńbek etý mindettemesiniń 5 jyldan 3 jylǵa deıin qysqarýyna qýanǵan shyǵar. Biraq, meniń oıymsha, barlyq jastar aımaqtarda jumystan ótýi kerek. Sebebi, óńirlerde jumys istemegen adamǵa ortalyqta jumys atqarý óte qıynǵa túsedi. Maǵan senińizder. Óz qyzmetimdi ortalyq memlekettik organda bastadym. Ortalyqtaǵy 15 jyldyq eńbekten keıin óńirge jumysqa kelgenimde shynymdy aıtsam, kóp nársege kózim ashyldy», - deıdi ol.

Osy rette, Shymkent qalasynyń ákimi jastardy óńirlerde eńbek etýge shaqyrdy.

«Aımaqtarda kóp tájirıbe alyp, bekem bola túsesizder. Óńirdi basyp ótseńizder, Astanada sizge eshkim «asfalttyń balasy» dep aıta almaıdy. Jastyq shaqta óńirlerde jumys isteý kerek degen oıdamyn. «Bolashaq» baǵdarlamasy men Astana, meniń oıymsha - Prezıdenttiń eń basty eki jobasy. Osy ekeýi elimizdiń aldaǵy 100 jyldaǵy damýyn aıqyndap beredi. Men úshin búgingi forým óte mańyzdy. Qazir Shymkentte 200-ge tarta «Bolashaq» túlegi jumys isteıdi. Barlyq nıet bildirýshilerge aıtarym: óńirlerge barǵysy keletinder - Shymkentke kelińder», - dep túıdi Ǵabıdolla Ábdirahymov.

Eske sala ketsek, Astanada «Bolashaq» halyqaralyq stıpendııasynyń 25 jyldyǵyna oraı «Adamı kapıtal - jańǵyrý negizi» atty forým ótip jatyr. Forým barysynda QR Memlekettik hatshysy Gúlshara Ábdiqalyqova Prezıdent Nursultan Nazarbaevtyń stıpendıattarǵa joldaǵan quttyqtaý hatyn oqyp bergen bolatyn. Elbasy «Bolashaq» halyqaralyq stıpendııasy dúnıejúzine tanylǵan qazaqstandyq brendke aınalǵanyn atap ótti.