Ǵabbas Qabyshulynyń túrik tiline aýdarylǵan «Kóńil kóginde» jınaǵynyń tusaýy kesildi
Qazaqstan Jazýshylar odaǵynyń múshesi, halyqaralyq «Alash» ádebı syılyǵynyń laýreaty, kórnekti qalamger Ǵabbas Qabyshulynyń túrik tiline aýdarylǵan «Kóńil kóginde» atty esseler jınaǵynyń tusaý keser rəsimi Ulttyq kitaphananyń N.Dáýletova atyndaǵy zalynda ótti.
Kitaptyń aýdarylýyna Qazaqstannyń Túrkııadaǵy Elshiligi men Eýrazııa Jazýshylar qaýymdastyǵy muryndyq bolǵan. Tusaýkeserge Ankaradan arnaıy kelgen elshilik qyzmetkeri, dıplomat, jazýshy Málik Otarbaev Qazaqstannyń Túrkııadaǵy Elshisi Abzal Saparbekulynyń quttyqtaýyn oqyp berdi.
«Kitap Elbasy Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýy men «Bolashaqqa baǵdar: rýhanı jańǵyrý» baǵdarlamasy aıasynda túrik tiline aýdaryldy. 2014 jyldan beri 30-dan astam qalamgerdiń kitaptary aýdarylyp basylyp, nasıhattalyp jatyr. Túrkııada kitap shyǵarý ońaı emes. Biraq shúkir, túrik baýyrlardyń qazaqtyń sóz ónerine degen yqylasy joǵary», - dedi Málik Otarbaev jazýshyny quttyqtaı kele.
Jazýshy Álibek Asqarov atalǵan eńbekke saǵynyshqa toly jınaq degen baǵa berdi.
«Ǵabbas aǵanyń kitaby saǵynyshqa toly kitap. Aǵalaryna, 60-70 jyldardaǵy adaldyqqa degen saǵynysh bar. Kitaptyń túrik tiline aýdarylǵany da qýantyp otyr. Kitapty 60-shy jyldardaǵy adamgershilik dáýiriniń gımni dese de bolady», - dedi Álibek Asqarov.
Kitap Eýrazııa Jazýshylar qaýymdastyǵyna qarasty «Bengý» baspasynan shyǵyp otyr.