Kanada, Frantsııa, Germanııa, Italııa, Japonııa, Ulybrıtanııa men AQSh-tyń syrtqy ister mınıstrleri men EO syrtqy ister jónindegi joǵary ókili «Iranda eshqashan ıadrolyq qarý bolmaıdy» degen ustanymyn rastap, Tegerandy ýrandy baıytýdy toqtatýǵa shaqyrdy, dep jazady Middle East Monitor.
- Biz kelissózderdi jandandyrýǵa shaqyramyz, onyń nátıjesinde Irannyń ıadrolyq baǵdarlamasyna qatysty barlyq baǵytty qamtıtyn, tekseriletin tabandy kelisim qalyptasady, - delingen habarlamada.
G7 ókilderi Iran men Izraıl arasyndaǵy atystyń toqtaýyn qoldaıtyndyqtaryn rastap, taraptardy óńirdi odan saıyn turaqsyzdandyratyn áreketterden aýlaq bolýǵa shaqyrdy.
Tegeran ekijaqty qarym-qatynastardyń shıelenisip ketýine baılanysty MAGATE-men yntymaqtastyqty toqtatqan bolatyn. 25-shi maýsym kúni zań shyǵarýshylar basym daýyspen Venada ornalasqan uıym ókildigimen yntymaqtastyqty toqtatýǵa daýys berdi. Zań sársenbi kúni kúshine endi.
AQSh Irannyń bul sheshimimen kelisýge bolmaıtynyn málimdedi.
- Biz bunymen kelispeımiz, sebebi Iran óziniń alǵan baǵytyn ózgertip, beıbitshilik pen gúldenýdi tańdaý múmkindigi týyp turǵanda MAGATE-men yntymaqtastyqty toqtatty, - dep málimdedi Memdepartamenttiń baspasóz hatshysy Temmı Brıýs.
BUU ókilderi de bul sheshimniń alańdatarlyq ekenin aıtty.
- Bul sheshim árıne, alańdatady. Menińshe, Bas hatshynyń Irandy MAGATE-men yntymaqtasýǵa shaqyrýy jáne barlyq memleketterdi ıadrolyq máseleler boıynsha MAGATE-men tyǵyz yntymaqtastyqta jumys isteýge úndeýi aqylǵa qonymdy degen oıdamyn,-dep málimdedi BUU Bas hatshysynyń baspasóz hatshysy Stefan Dıýjarrık.
Atom energııasy jónindegi halyqaralyq agenttikpen yntymaqtastyqty toqtatýy aıasynda Irannyń ıadrolyq nysandarynyń qazirgi mártebesi belgisiz.
Jeksenbi kúni Irannyń BUU-daǵy elshisi Amır Saıd Iravanı ınspektorlardyń jumysy toqtatylǵanyn, alaıda olarǵa nemese MAGATE-ge qatysty qandaı da bir qoqan-loqqy jasalmaǵanyn málim etti.
Ol ınspektorlardyń Iranda, qaýipsiz jerde ekenin málimdep, «alaıda olardyń jumysy toqtatyldy jáne bizdiń nysandarǵa kirýge tyıym salynǵan»,-dedi.
Osyǵan deıin Pentagon Irannyń ıadrolyq baǵdarlamasy shamamen eki jylǵa keıinge qaldyrylǵany týraly málimdegen bolatyn.