G.Ábdiqalyqova ShQO áıelder qaýymymen kezdesti

ASTANA. QazAqparat - Qazaqstan Respýblıkasynyń Memlekettik hatshysy Gúlshara Ábdiqalyqova Shyǵys Qazaqstan oblysyna jumys saparynda júr, dep habarlady Aqordanyń baspasóz qyzmeti.

Sapardyń birinshi kúni G.Ábdiqalyqova «Qazaqstan halqynyń birtektiligi men birligi 100 naqty qadam turǵysynda» atty ǵylymı-praktıkalyq konferentsııada quttyqtaý sóz sóılep, áıelder qaýymymen kezdesti jáne birqatar áleýmettik keshenderde bolyp qaıtty.

Qazaqstan Respýblıkasy Konstıtýtsııasynyń 20 jyldyǵyna arnalǵan ǵylymı-praktıkalyq konferentsııaǵa Shyǵys Qazaqstan oblysynyń ákimi D. Ahmetov, Qazaqstan halqy Assambleıasy tóraǵasynyń orynbasary - Hatshylyq meńgerýshisi E.Toǵjanov, QR Konstıtýtsııalyq keńesiniń múshesi V.Malınovskıı, sondaı-aq ǵalymdar, sýdıalar korpýsy, quqyq qorǵaý jáne qadaǵalaý organdarynyń basshylary, etnomádenı birlestikter men jurtshylyq ókilderi qatysty.

Konferentsııaǵa qatysýshylar konstıtýtsııalyq qurylys, etnosaralyq qatynas salasyndaǵy memlekettik saıasatty iske asyrý, qazaqstandyq patrıotızm men birtektilikti qalyptastyrý jónindegi keshendi jumystar, Qazaqstan halqy Assambleıasynyń «Úlken el - úlken otbasy», «Meniń elim» syndy keń aýqymdy áleýmettik jobalaryn iske asyrý, «Máńgilik El» ıdeıasyndaǵy qundylyqtardy qazirgi oqý baǵdarlamasyna engizý týraly máselelerdi talqylady.

Memlekettik hatshy sondaı-aq áıelder qaýymymen: máslıhat depýtattarymen, bıznes-qaýymdastyqpen, mádenıet jáne bilim berý mekemeleri, qoǵamdyq uıymdar basshylarymen kezdesti. «100 naqty qadam» Ult Josparyn iske asyrýǵa áıelder qaýymynyń atsalysýyn jandandyrý, áıelder kásipkerligin qoldaý, memlekettik jáne qoǵamdyq basqarý isindegi áıelderdiń úlesin arttyrý, otbasylyq-demografııalyq saıasatty damytý máseleleri talqylandy.

G.Ábdiqalyqova paıdalanýǵa bıyl berilgen oblystyq Qan ortalyǵynda boldy. Zamanaýı avtomattandyrylǵan qural-jabdyqtar laboratorııalyq zertteýlerdiń sapaly bolýyn jáne oblystyń medıtsınalyq uıymdaryn joǵary sapaly qanmen qamtamasyz etedi. Ortalyqta joǵary bilikti mamandar qyzmet etedi: medıtsınalyq personaldyń 93 paıyzy joǵary jáne birinshi sanatqa ıe bolsa, 7 maman AQSh-ta, Germanııada, Izraılde, Reseıde, Polshada oqý kýrsynan ótken.

2014-2015 oqý jylynyń UBT kórsetkishi boıynsha oblystyń eń úzdik mektebi bolǵan O.Bókeı atyndaǵy №44 mektep-lıtseıde Memlekettik hatshyǵa UBT qorytyndylary, jazǵy demalysty uıymdastyrý, oqý jylyna daıyndyq barysy týraly aqparat usynyldy, sondaı-aq «Túlek.kz» (túlekter), «Meıirim» (jetimderdi qoldaý), «Okno v mır» (ınklıýzıvti bilim berý) jobalary tanystyryldy.

Sondaı-aq G.Ábdiqalyqova «Jumyspen qamtý jol kartasy - 2020» baǵdarlamasyna qatysqan azamattardyń otbasylarymen kezdesti. Óskemen qalasynyń 19-turǵyn aýdanynda 2013 jyly «Jumyspen qamtý jol kartasy - 2020» baǵdarlamasynyń úshinshi baǵytynyń 2-komponenti aıasynda salynǵan kóppáterli turǵyn úıge 60 otbasy qonystanǵan. Onyń ishinde ekonomıkalyq áleýeti tómen eldi mekenderden kelgen otbasylar bar.

Oblystyq tarıhı-ólketaný murajaıynda Memlekettik hatshynyń nazaryna Qazaqstan halqy Assambleıasynyń 20 jyldyǵyna, Qazaqstan Respýblıkasy Konstıtýtsııasynyń 20 jyldyǵyna, Qazaq handyǵynyń 550 jyldyǵyna arnalyp qoıylǵan ekspozıtsııalar, sondaı-aq «Qazaq eli: tarıh, taǵylym, táýelsizdik» atty jyljymaly kórme usynyldy.

Memlekettik hatshy kezdesýler qorytyndysy boıynsha memlekettik organdarǵa naqty tapsyrmalar berdi.