G.Ábdiqalyqova: Memlekettik muraǵattarda elektrondy qujattardy saqtaıtyn tehnologııalar joq
«Qazirgi ýaqytta Qazaqstannyń muraǵattary eldiń ómirinen syr shertetin tarıhı qundy jádigerlermen tolyqtyrylyp jatyr. Reseı, Qytaı, Germanııa, AQSh, Mysyr jáne taǵy basqa memleketterden tarıhı qujattar jetkizildi. Sonymen qatar búgin biz muraǵat isindegi birqatar júıeli máselelerdi talqylaýymyz shart. Atap aıtqanda, «Máńgilik El» jalpyulttyq jospardyń 4 reformasy boıynsha, qazaqstandyq tarıhı ǵylymnyń muraǵat kózderin anyqtaý, zertteý, tolyqtyrý jóninde júıeli ister atqarýymyz kerek. Osy maqsatta alys jáne jaqyn shet memleketterdiń jetekshi muraǵattarymen, ýnıversıtetterimen, zertteý ınstıtýttarymen keń formatta áriptestikti tereńdete túsý qajet», - dep atap ótti Memlekettik hatshy.
Onyń aıtýynsha, aqparattyq, telekommýnıkatsııalyq tehnologııalar memleket ómiriniń barlyq salasyna dendep enip jatyr, degenmen eldegi muraǵattar aqparattyq tehnologııa boıynsha artta qalyp keledi.
«Muraǵattardyń deni elektrondy qujatty qabyldaýǵa tolyq daıyn emes. Olardyń kóbi elektrondy málimetterdi saqtaıtyn qajetti jabdyqtardan da tapshylyq kórýde. Bul óz kezeginde halyqqa memlekettik qyzmet kórsetý kezinde jáne memlekettik muraǵattardaǵy qujattardy kádege jaratý barysynda edáýir qıyndyqtar týǵyzady», - dedi ol.
G.Ábdiqalyqova, sonymen qatar óńirlerdiń aqparattaryn bir ortalyqta qaraýǵa bolatyndaı biryńǵaı bazanyń joqtyǵyna da nazar aýdardy.
«Ulttyq muraǵat, árıne úzdik muraǵattardyń biri. Alaıda oblystarda da kóptegen qujattarymyz jatyr, biz ony bir jerden kórý múmkindigine qol jetkize almaı kelemiz. Qazaqstanda qujattardy mıkro, fotokóshirý jáne materıaldardy qalpyna keltirý boıynsha jalǵyz ortalyq zerthana áli kúnge deıin 1959-1975 jyldardaǵy tehnologııany qoldanýda. Qazaqstandyq muraǵattarda qazirgi zamanǵy aqparattyq-ınnovatsııalyq tehnologııalar engizilmeı jatyr», - dep túıdi oıyn G.Ábdiqalyqova.