G.Ábdiqalyqova: «Qazaqstandyq jol» - ekonomıkalyq jáne áleýmettik ǵajaıyptyń fenomeni

ASTANA. QazAqparat - Polıetnostyq halyqtyń birligi - Qazaqstan memleketiniń tuǵyry bolyp tabylady. Bul týraly búgin Astanada L.N.Gýmılev atyndaǵy Eýrazııa ulttyq ýnıversıtetinde ótkizgen dárisinde Qazaqstannyń Memlekettik hatshysy Gúlshara Ábdiqalyqova osylaı málim etti.

«Elbasy Nursultan Ábishuly Nazarbaevtyń táýelsizdik jyldaryndaǵy qoǵam men jalpyulttyq kelisimdi nyǵaıtýǵa baǵyttalǵan syndarly saıasatynyń arqasynda búgingideı álem moıyndaǵan mártebeli memleketimiz Qazaqstan Respýblıkasy qalyptasty. Bul oraıda qazaqstandyq birlik pen kelisim modelin ornyqtyrýdyń negizgi mindetin Qazaqstan halqy Assambleıasy atqaryp keledi», - dep atap ótti ol.

Memlekettik hatshy qoǵamda Assambleıa árdaıym turaqtandyrýshy ról atqaryp kele jatqanyn aıtty.

«1995 jyly 1 naýryz kúni QHA quryldy. Bul kezde bizdiń astanamyz Almatyda bolatyn. Burynǵy UǴA keńesinde osy Assambleıanyń birinshi otyrysy ótti. Sonda Elbasynyń bir aıtqan sózi bar: «Bizdiń qoǵamdy toptastyratyn mehanızmniń biri - Qazaqstan halqy Assambleıasy bolýǵa tıis. Bizdiń basty baǵytymyz - ortaq mámileni izdestirý jáne biriktirýshi negizderdi nyǵaıtý arqyly barlyq ulttyq toptardy damytýǵa arqa súıeýi tıis. Men el Prezıdenti retinde qoǵamdyq turaqtylyq pen ultaralyq kelisimdi nyǵaıtýdy ózimniń negizgi mindetim dep sanaımyn. Bul kelisim kókten túspeıdi, qajyrly jumys arqyly qol jetkiziledi». Bul sózderdi Prezıdent osydan jıyrma jyl buryn aıtqan bolatyn. Qajyrly eńbektiń arqasynda táýelsizdik shejiresinde Assambleıa árdaıym turaqtandyrýshy ról atqaryp keledi. Assambleıanyń 20 jyldyq qorytyndylaryn shyǵara otyryp, Qazaqstan birlik pen kelisim saıasatynyń konstıtýtsııalyq qaǵıdattary men qoǵamnyń júıeli yqpaldasýyn bekigenin tolyq quqyqpen aıtýǵa bolady. Assambleıa konstıtýtsııalyq organǵa elimizdiń jalpyazamattyq jáne jalpyhalyqtyq ınstıtýtyna aınaldy. Al polıetnostyq halyqtyń birligi - Qazaqstan memleketiniń tuǵyry», - dedi G.Ábdiqalyqova.