G.Ábdiqalyqova álemniń kóshbasshy áıelderin EKSPO-2017-de jasyl ekonomıkadaǵy ınnovatsııalyq oılardy talqylaýǵa shaqyrdy

ASTANA. QazAqparat - Qazaqstan Respýblıkasynyń Memlekettik hatshysy, QR Prezıdenti janyndaǵy Áıelder jáne otbasylyq-demografııalyq saıasat jónindegi ulttyq komıssııa tóraıymy Gúlshara Ábdiqalyqova Varshavada ótken Jahandyq Áıelder sammıtiniń jabylý saltanatynda sóz sóıledi, dep habarlady Aqordanyń baspasóz qyzmetinen.

Memlekettik hatshy 2017 jyly Astanada «Bolashaqtyń energııasy» taqyryby boıynsha mamandandyrylǵan EKSPO kórmesi ótetinin aıtty.

Kórmede Jahandyq Áıelder sammıti aıasyndaǵy Áıelder forýmyn uıymdastyrý josparlanyp otyr.
G.Ábdiqalyqova sammıtke qatysýshylardy osy Áıelder forýmyna qatysýǵa shaqyrdy.

Memlekettik hatshy búkil álemniń barlyq kóshbasshy áıelderin EKSPO-2017 kórmesinde jasyl ekonomıka salasyndaǵy ınnovatsııalyq oılar men úzdik tehnologııalardy talqylaýǵa atsalysýǵa úndedi.

Sammıt sheńberinde G.Ábdiqalyqova Polsha Respýblıkasynyń resmı ókilderimen birqatar kezdesý ótkizdi. Máselen, Polsha Senatynyń vıtse-spıkeri M.Kotspen kezdesý barysynda Qazaqstan jáne Polsha parlamentteri qos palatalarynyń ózara yntymaqtastyq toptary áriptestigi parlamentaralyq ózara is-qımylǵa jańa serpin beretinine nazar aýdaryldy.

Memlekettik hatshy Polsha Respýblıkasy Prezıdenti keńsesiniń basshysy M.Sadýrskaıamen kezdesýde halyqaralyq standarttarǵa sáıkes elimiz Qazaqstanda turatyn barlyq ulttyq toptardyń quqyqtary tolyqtaı saqtalýyn jáne múddelerin eskeretinin aıtty. Búginde respýblıkamyzda ulttyq jáne mádenı jańǵyrý máselesimen aınalysatyn polıaktardyń 13 etnomádenı birlestigi jumys isteıdi.
Sondaı-aq sammıt aıasynda G.Ábdiqalyqova Polsha Respýblıkasynyń Otbasy, eńbek jáne áleýmettik saıasat jónindegi mınıstri E.Rafalskaıamen kezdesti. Kezdesý barysynda Memlekettik hatshy jańa Eńbek kodeksinde jumys berýshi men jumysshy arasyndaǵy eńbek qatynastary salasyna memlekettiń aralasýynyń shegi aıqyndalǵanyna, jumysshylarǵa beriletin kepildikter men olardyń ótemaqylarynyń eń tómengi eńbek standarttary bekitilgenine jáne jumys berýshi tarapynan onyń oryndalýyn baqylaý qamtamasyz etilgenine nazar aýdardy.

Sammıt barysynda Memlekettik hatshy sammıtke qatysý úshin kelgen delegatsııalar basshylarymen - Vetnamnyń vıtse-prezıdenti D.Thınmen, Frantsııanyń Otbasy, balalar jáne áıelder quqyqtary jónindegi mınıstri L.Rossınonlmen, Germanııanyń Otbasy, qart adamdar, áıelder jáne jastar jónindegi Federaldyq mınıstrliginiń parlamenttik memlekettik hatshysy E.Fernermen, Malaızııanyń Áıelder, otbasy jáne qoǵamdyq damý jónindegi mınıstri R.Karımmen birqatar kezdesý ótkizdi. Kezdesýlerde áıelderdiń ekonomıkalyq turǵydan ilgerleýiniń, elder arasyndaǵy halyqaralyq bastamalar men ınvestıtsııalyq ózara is-qımylǵa birlese qoldaý kórsetýdiń ózekti máseleleri talqylandy.

Sammıt sońynda G.Ábdiqalyqova «Áıelderdiń jahandyq kóshbasshylyǵynyń marapattary» atty Gala keshki asqa qatysty.