Fýtzaldan Portýgalııadaǵy týrnır: «Qaırat» ekinshi márte jeńiske jetti

ASTANA. QazAqparat - Almatylyq «Qaırat» fýtzaldan Portýgalııada ótip jatqan «International Masters Cup» týrnırinde ekinshi márte jeńiske jetti, dep habarlaıdy QazAqparat tilshisi.

Qazaqstandyq komanda ekinshi kezdesýinde Portýgalııanyń «Benfıka» klýbymen sheberlik baıqasty.

Oıyn 5:2 esebimen «Qaırattyń» jeńisimen aıaqtaldy. Olardyń qatarynan Kaıo Rýıs pen Aleks Vıana eki goldan soqsa, Dener Rodrıgo bir márte mergendik tanytty.

Aıta ketsek, «Benfıka» 2009/10 jylǵy maýsymda fýtzaldan ÝEFA kýbogynyń (qazirgi fýtzaldan Chempıondar lıgasy) jeńimpazy bolǵan.

Endi almatylyq klýb 26 tamyzda elorda ýaqytymen 23:30-de portýgalııalyq «Bragamen» kezdesedi.

Eske salsaq, budan buryn «Qaırat» atalǵan týrnırde ataqty «Sportıngten» basym tústi.

Al «Qaırat» fýtzaldan «Mucho Mas» týrnırinde qola júldege ıe boldy.