Fýtzaldan Chempıondar lıgasy: «Qaırat» sońǵy matchyn iri jeńispen túıindedi

<p>ASTANA. KAZINFORM &mdash; Zagreb qalasynda (Horvatııa) fýtzaldan Chempıondar lıgasynyń elıtalyq kezeńinde &laquo;Qaırat&raquo; komandasy B tobyndaǵy sońǵy kezdesýin horvatııalyq &laquo;Fýtzal Dınamomen&raquo; ótkizdi.</p>

Ispanııalyq maman Marlon Velaske jattyqtyratyn almatylyqtar osyǵan deıin eki oıynynda qarsylastaryn tize búktirip, merziminen buryn fınaldyq kezeńge joldama alǵan edi. 

Birinshi taımda 19-mınýtta horvatııalyq klýbtan Danıel Dekanıch «Qaırattyń» qaqpashysy, brazılııalyq Dennıstiń qateligin paıdalanyp, esep ashty. Osy kezeńniń aıaqtalýyna sanaýly sekýndtar qalǵanda, Edsonnyń soqqysyn «Fýtzal Dınamo» qaqpashysy qaıtarǵanymen, Gege múlt ketken joq – 1:1.

Ekinshi taımda 32-mınýtta horvatııalyq qorǵaýshy Mıhovıl Prgomet óz qaqpasyna gol soǵyp aldy. Bir mınýttan keıin Edsonnyń pasyn Birjan Orazov keremet paıdalandy. 37-mınýtta Alısson esepti 4:1-ge jetkizdi. Sońǵy mınýtta Zanotto matchtyń núktesin qoıdy – 5:1.

Osylaısha, «Qaırat» sońǵy matchyn iri jeńispen túıindep, upaı sanyn 9-ǵa jetkizdi.

Barlyq toptyq básekeler máresine jetip, aldaǵy jyly mamyr aıynda ótetin Chempıondar lıgasynyń tórttik fınalyna qatysatyn komandalar belgili boldy. Oǵan Ispanııadan «Palma» men «Kartahena», Qazaqstannan «Qaırat» jáne Portýgalııadan «Sportıng» joldama aldy.

Eske sala keteıik, budan buryn «Qaırattyń» fýtzaldan Chempıondar lıgasynyń fınaldyq kezeńine shyqqanyn jazǵan bolatynbyz.

Sondaı-aq «Semeı» fýtzal klýby slovakııalyq qarsylasyn iri eseppen jeńdi.

Degenmen elıtalyq kezeńge alǵash ret qatysqan semeılikter D tobynan fınaldyq kezeńge óte alǵan joq. Bul toptan 7 upaımen Chempıondar lıgasynyń eki dúrkin jeńimpazy, ıspanııalyq «Palma» klýby ozyq shyqty.