Fýtbolshy, qobyzshy Tatıana Gerasımova: qazaqtyń tili de dalasyndaı baı

ALMATY. QazAqparat - Áleýmettik jeliler damyǵaly qazaq tilinde sóıleıtin ózge ult ókilderi arasynda blogerler sany artyp, ózindik aýdıtorııasy qalyptasyp keledi. Solardyń biri – Tatıana Gerasımova. Ol qazaqtyń mádenıeti men dástúrin de bala kúninen boıyna sińirip ósken, qobyz aspabyn jetik meńgergen. Instagram jelisinde 21 myńnan astam oqyrmany bar 21 jastaǵy Tatıana QazAqparat tilshisine aldaǵy josparlary týraly aıtyp berdi.

- Tatıana, qazaq tilinde jaqsy sóıleısiz. Tildi qalaı úırendińiz?

- Orys ultynan bolsam da qazaq tilin kishkentaı kezimnen bilemin. 2002 jyly Aqtaý qalasynda dúnıege keldim. Aǵam ekeýmiz Aqtaýdaǵy balalar úıinde tárbıelendik. Qazaq mektebinde bilim aldym. Qazaq tili – óziniń dalasyndaı baı, óte ádemi til dep esepteımin. Dostarymnyń basym bóligi qazaqtar. Biraq, anam qazaq tilinde sóılemeıdi.

- Anam dep qaldyńyz, sizdi basqa otbasy asyrap aldy ma?

– Joq. Men 3 jasymnan 18 jasqa deıin balalar úıinde óstim. Týǵan anamyzben baılanys úzilgen emes. Anam aǵamdy, meni jáne eki inisin balalar úıine ótkizgen bolatyn. Biraq, bizdi birjola tastap ketken joq. Jıi kelip turatyn. Qazir bárimiz birge turamyz. Biz anamyzdy kinálamaımyz. Bul – taǵdyr. Tipti, ol kisige eshqashan renjigen emespiz.

– Negizgi mamandyǵyńyz qandaı?

– Mektepti bitirgen soń, Aqtaý qalasynyń 2-shi shaǵynaýdanynda ornalasqan gýmanıtarlyq kolledjde bilim aldym. Mamandyǵym – jattyqtyrýshy. 13 jyl fýtbolmen shuǵyldandym. Qazaqstan qyzdar quramasynda boldym. Shymkent qalasynyń «BIIK-Qazyǵurt» qyzdar fýtbol komandasynda kelisimshart boıynsha 3 jyl oınadym. Qazir eshqandaı komandada joqpyn. Fýtboldy ázirshe qoıa turamyn. Jan-jaqty bolǵym keledi, ózimdi myqty sezingim keledi.

– Menińshe siz jan-jaqty, ári belsendisiz. Qazaqtyń qobyzyn quıqyljyta tartady ekensiz . Ony qaıdan úırendińiz?

– Iá, ónerden de qur qol emespiz. Qobyz kýrsyna alty jyl bardym. Qazaq mýzykasynda qobyzdyń alatyn orny erekshe. Qobyz adamnyń daýysyn, qasqyrdyń ulýyn, aqqýdyń qıqýyn, jel men sýdyń únin bere alady. Bul aspap maǵan qatty unaıdy. Qolym bos kezde oınaımyn. Alaıda, kásibı túrde aınalysyp kórgen joqpyn. Bir kezderi án de salǵam. Qazaqtyń tilin ǵana emes, mádenıeti men dástúrin bala kúnimnen boıyma sińirip óstim. Endi blogerlikke bet burdym. Qazir 21 myńnan asa oqyrmanym bar.

– Oqyrmanyńyzben baılanysyńyz qalaı?

– Men óz paraqshama kúndelikti ómirimdi esh búkpesiz shynaıy salyp otyramyn. Bul vıdeolardy qyzyǵýshylyǵym bolǵandyqtan jelige salamyn. Qazaq tilinde sóıleımin. Qudaıǵa shúkir, qazaq tilinde erkin sóılep, saýatty jazamyn. Oqyrmandarymnyń basym bóligi – úlken kisiler. Kóshege shyqqanda tanyp jatady. Menimen sýretke túsetinder bar. «Oqyrmanyńyzbyn» dese kádimgideı qýanyp qalamyn.

– Sóz arasynda, Qudaıǵa shúkir dep qaldyńyz. Shúkirshilik – musylmannyń sıpaty. Siz musylmansyz ba?

– Iá, ıslam dinin qabyldadym. Biraq, namaz oqyp, meshitke barmaımyn. Balalar úıinde júrgende «Bısmıllá» dep aıtyp qalǵanym bar. Sol kezde dostarym «sen endi musylmansyń» dedi. Sol kezde qabyldadym dep oılaımyn.

– Arman, maqsattaryńyz jaıly aıtyp berseńiz?

– Men armanym týraly posttarymda kóp jazamyn. Alǵa qoıǵan maqsatym aıtarlyqtaı. Eń aldymen, oqyrmandar sanyn taǵy kóbeıtkim keledi. Sol úshin Aqtaýdan Almatyǵa kóship keldim. Almaty – jastarǵa múmkindik beretin alyp shahar. Ideıalarymdy osy qalada júzege asyrǵym keledi. Aqtaý qalasyda dúken ashý josparymda bar.

– Suhbatyńyzǵa rahmet!

Foto: instagram.com/tanyaa__10