Fýtbolshy Baýyrjan Islamhan «Ordabasy» klýbynda oınaıdy

ASTANA. QazAqparat - Fýtboldan Qazaqstan quramasynyń jartylaı qorǵaýshysy Baýyrjan Islamhan resmı túrde Premer-lıgada synǵa túsetin shymkenttik «Ordabasy» klýbynyń oıynshysy atandy, dep habarlaıdy QazAqparat tilshisi.

Shymkenttik klýb ony óz quramyna qosý úshin budan buryn oınaǵan Birikken Arab Ámirliginiń «Al-Aın» komandasynyń ruqsaty qajet edi. Degenmen ol birshama ýaqyt keshiktirildi. Nátıjesinde atalǵan ruqsat alynyp, ol jańa komandasy quramyna qosylýyna múmkindik jasaldy.

Aıta ketsek, 2020 jyldyń qyrkúıek aıynda «Al-Aın» komandasy quramynda Azııa chempıondar lıgasyndaǵy kezekti oıynynan keıin ol tapsyrǵan dopıng-synamasy oń nátıje kórsetken edi. Odan tyıym salynǵan metılgeksanamın tabylyp, eki jylǵa úlken fýtboldan shettetildi.

Ol Qazaqstan ulttyq quramasynyń qarasha aıynda Ózbekstan jáne Birikken Arab Ámirligi quramalarymen ótetin joldastyq kezdesýlerine shaqyrtý aldy.

Baýyrjan Islamhan 1993 jyly 23 aqpanda Taraz qalasynda dúnıege kelgen. 2011 jyldan beri qazaqstandyq «Taraz», «Astana», «Qaırat», Reseıdiń «Kýban», Birikken Arab Ámirliginiń «Al-Aın» klýbtary jáne el quramasynda 311 oıyn ótkizip, 74 goldyń avtory atandy. El quramasynda 46 oıynda 3 gol soqty.