Fýtboldan «Jetisaı» qaıtadan kósh basyna shyqty

<p>ASTANA. KAZINFORM - Fýtboldan Birinshi lıga komandalary arasyndaǵy Qazaqstan birinshiliginiń XIІ týrynda Túrkistan oblysynyń &laquo;Jetisaıy&raquo; kósh basyna shyqty.</p>

Túrkistandyq komanda óz alańynda «Arys» klýbyn qabyldady. Bul joly da jeńiske jetýge bar kúshin saldy. Dese de óz qaqpasyna birinshi bolyp gol jiberip aldy.

Oıynnyń 67-mınýtynda «Arys» komandasynan Ersaıyn Begaly esep ashyp ketti. Oǵan «Jetisaı» sapynan Asyljan Asatýlla 91, Elaman Aıtóre 92-mınýtta eki golmen jaýap qaıyrdy.

Osylaısha olar qarsylasynan 2:1 esebimen basym túsip, birinshiliktegi segizinshi jeńisine qol jetkizdi. Nátıjesinde 25 upaımen qaıtadan birinshi orynǵa kóterildi.

Atalǵan týrda óz alańynda «Ulytaý» «Han Táńirine» 0:2, «Túrkistan» «Altaıǵa» 1:2 esebimen ese jiberdi.

Al «Ekibastuz» «SD Family» komandasyn 4:2, «Oqjetpes» «Aqtóbe-2» klýbyn 1:0, «Kaspıı» «Tarazdy» 3:0, «Qaırat-2» «Qaısar-2» ujymyn 6:1 esebimen jeńdi.

Endi XIІІ týr oıyndary 27 maýsym kúni ótkiziledi.

Eske salsaq, «Atyraý» men «Aqtóbe» fýtboldan Qazaqstan kýbogy fınalyna shyqty.